3619/2022-2023
Kolasib dated 17th February 2023: Vawiin chawhnu khan DC pisaah District Jail tang dam lo leh boral an awm palh a hmalak dan tur leh Jail tangte hriselna uluk zawk a enkawl a nih theih nan thutkhawmna neih a ni a. Pu John LT Sanga, Deputy Commissioner chuan hun kaihruaiin Pu Vanlalfaka Ralte, SP, Pi Cacy Malsawmtluangi, CJM, Dr. Samuel L.Fanai, DMS, Pu Hmingthanzuala, DIPRO leh Pu Lalmuanpuia, Superintendent, District Jail, Kolasib te an tel a ni.

Thutkhawmnaah hian Jail tang tur te chu Jail-a dah luh an nih hma ngeiin an hriselnate uluk tak a endik a tul thu leh Jail an awm chhung pawh a endikna uluk tak a kalpui a pawimawh thu sawi a ni a. National Human Rights Commission-in kalphung a duan te zawm a pawimawh thu leh heng kalphungte hi thawktute pawhin an hriatchian a tul thu tarlan a ni. Superintendent, District Jail tarlan danin District Jail, Kolasib ah hian tang 73 awmin an zing a 67 chu mipa an ni a, hmeichhia 6 an awm mek bawk a ni. Jail tang zingah kut inthlakna emaw thawktute atangin intihduhdahna a awm awm hriat a nih loh thu tarlan a ni a, hriselna pan deuh leh dam lo awmte chu Jail chhunga inenkawlna bak ah District Hospital-ah te a tul anga enkawlna pek an nih thin thu sawi a ni. Jail tanglai boral, ‘Custodial Death Case’ a awmin NHRC-in a phut anga hmalak dan tur te sawi ho niin hna sawt zawk a kalpui a nih theih nan District pawn a thawn ngai chi Test hrang hrang result chak zawk a hmuh a tul thu tarlan a ni bawk.