Nimin khan Kolasib DC Pu H. Lalengmawia IAS chuan CZS Higher Secondary School a tlawh a, zirlai naupang leh zirtirtu te fuihin hun a hmanpui.

Pu H.Lalengmawia chuan Kolasib District chuan kawng hrang hrangin hma a sawn a mahse District-in Mizoram anga mithiam a la chherchhuak tlem chu tan nasa lakna tur a awm nia a hriat thusawiin hemi atan hian zirna chu District mipui leh zirtirtu ten nasa leh zawka kan ngaihpawimawh a tul a, chuti rualin kawng tin renga zir lai naupangte chu fuih leh kahihruai a ngai a ni, a ti a. Zirlai naupangte chu Mizoram leh District mi chhenfak awm leh mi tangkai ni turin a fuih a. Mi hlawhtling ni turin hmanraw dang a ngai lova, mahni a thil awmsa kan hmanthiam a ngai a, tumruhna, tuarchhelna, beisenna, hma lam eng zawnga thlirna leh mahni inrintawkna nen tan kan lak chuan hlawhtlinna kan nei thei theuh a, hemi atan hian kan rilru leh kan ngaihtuahna te kan buatsaih a tul a ni tiin zirlai te hi a fuih a. Zirtirtu te chu an naupang te hnenah textbook-ah zirtir chauh duh tawk lova lehkha bu dang tha te chhiara chuta an zirlai kaihhnawih academic(zirna) chaw tha pe thin turin a chah a. An zirlai naupangte chu hmangaihna leh lainatna nen enkawl turah chahin an naupangte dinhmun leh chanchin te zirchian a tul a, chumi milha zirlai te enkawl a pawimawh a ni, a ti.

He hunah hian Kolasib SP Pu C. Lalzahngoa pawhin zirlai naupangte fuihin zirna hian mihring hi mi puitlinga min siam a, lehkhathiam hi mihring nunah chuan thil tlo ber, a tawp thlenga mihring te hnenah awm a ni, a ti a. Tunlai khawvel a rilru la peng thil tam tak a awm a, chungte lakah fihlima an zirna atan an hun zawng zawng hmang turin zirlaite a fuih bawk a ni.

He hunah hian DC tawimawmtu Additional DC Pu R. Lalremsanga pawhin thu a sawi a ni.