76/2022-2023
Kolasib dated 7th April 2022: Vawiin chawhma khan Pu John LT Sanga, Deputy Commissioner, Kolasib district chuan DC mawhphurhna a chelh hnua a hmasa berna atan Kolasib District chhung a Sawrkar department hrang hrang hotute chu DC Conference Hall-ah a kawm a. Kolasib district chhung a sawt zawk a hmasawnna a thlen theih nan District chhunga department hrang hrangte hian inpawh tak chung a thawhhona tha neih a pawimawh thu a sawi.

Deputy Commissioner Pu John LT Sanga chuan Kolasib khua chu a tlangnel tawhna sa a nih avangin DC mawhphurna chelh pawh phurawm a tih thu a sawi a, chutih rual chuan Kolasib district chu Mizoram luhka pui, State thenawmte nena ramri thui tak intawm a nih angin district chhung a Sawrkar department hrang hrang hotute nen pheikhai rual tak a thawhho a tul thu a sawi bawk a ni. DC chuan hrileng dinhmun thlirin Kolasib chu Mizoram district hrang hrangte nen khaikhin pawh a dinhmun tha pawl a nih mek thu a tarlang a, hei hi District chhung a department hrang hrang, NGO leh khawtlang tanrualna vang a nih thu sawiin tha thlah loa midangte hnen a ‘Covid Appropriate Behaviour’ zirtirtu nih tum zel turin kalkhawmte a ngen.

Kolasib DC chuan Sawrkar hnathawkte chu mipuite tan a rawngbawl tur a rawih an nihna hre thar leh turin a chah a, mahni hna theuh ah chian a, mahni mawhphurna theuh hlenchhuah chu dah pawimawh hmasa fo turin a fuih bawk a ni.

Vawiin thutkhawmna hi Pu Lallawmawm, Addl. DC-in kaihruaiin Kolasib district chhung a Sawrkar department hrang hrang hotute an tel a. Inhmelhriatna hunt e hman niin hrileng dona kawng a hmalaknate, Kangmei ven kawng a hnathawh dan te, KTP khawmpui thleng tur a inbuatsaihnate leh Department hrang hrangte hnathawh dan sawihona hun hman a ni bawk.