77/2022-2023
Kolasib dated 7th April 2022: Vawiin chawhma khan 1st IR Bn Hqrs, Mualvumte chuan ‘Infiamna Hunpui 2022’ hawnna hun buatsaihin Pu K.Laldawngliana, MLA, Tuirial Assembly Constituency chuan khuallian niin a hmanpui.

Khuallian Pu K.Laldawngliana, MLA chuan ram leh hnam tan a mi chhuanawm leh fakawm tak tak awmna 1st IR Bn, Mualvuma ‘Infiamna Hunpui 2022’ hmang thei tur a hmalakna chu lawmawm a tih thu sawiin he infiamna hun buatsaihna hian thawktute inkarah inpawhna leh inthianthatna tha lehzual a siam phah ngei a beisei thu a sawi. Pu K.Laldawngliana chuan nuam titak a infiam tur chuan taksa leh rilru a hrisel tel a tul thu a sawi a, chumi tur chuan taksa leh rilru khawih chhe thei, ruihhlo laka fihlim hmasak a pawimawh thu sawiin chutiang mi nitur chuan hma la zel turin kalkhawmte a chah a. Hnathawhnaa rintlak leh rinawm ni turin MLA chuan 1st IR Bn, Mualvuma thawktute chu a fuih a, infiamna leh inelna hlimawm tak hmang turin duhsakna a hlan bawk a ni.

Hun kaihruaitu Pu M.S Dawngkima, MPS, Commandant, 1st IR Bn chuan 1st IR Bn Armed Police ten hna tha taka an thawh theih nan, rilru leh taksa hrisel an neih a pawimawh avangin hetiang infiamna hunpui hi buatsaih an ni tih a sawi a, Mizoram thalaite pawh rilru leh taksa hrisel an neih theih nan infiamna leh taksa sawizawina lam ngai pawimawh turin a chah a ni. Pu F.Lalthlamuana, MPS, Dy. Commandant II hnen atangin ‘Infiamna Hunpui 2022’ inbuatsaihna leh inelna hrang hrangte kalpui dan tur ngaihthlak a ni bawk.

Kum hnih (2) chuang hripui avanga nunphung a khaihlak hnuah 1st IR Bn, Mualvum a thawk Police-ten rilru leh taksa hrisel an neih theih nan ‘Infiamna (Sports) Hunpui 2022’ hi ni hnih awh tur buatsaih a ni a. 1st IR Bn te hian Kolasib District chhunga dan leh thupek kenkawh chungchangahte leh Mizoram leh Assam inrina ramri ven hnate thawkin an fehchhuak thin a ni.