Vawiin khan Mizoram KVI Board, Kolasib Office leh District Urban Development & Poverty Allevation Office, Kolasib chuan Kolasib khawpui chhunga Self Employment Programme (SEP) atan National Urban Livelihoods Mission (NULM) hnuaia mi 44 an thlanchhuahte tan ni 3 awh Entrepreneurship Development Training chu DUDO Conference Hall, Brig. Vankunga Shopping Complex, Kolasib ah an tan a. He Training hawnna programme hi Kolasib DC Pu H. Lalengmawia, IAS in a hmanpui a ni.

Pu H Lalengmawia chuan SEP kaltlanga bank atanga loan an hmuh tur chu tha taka rul turin he huna training tura kalkhawmte chu a chah a. Tha taka loan an rulh chuan bank lam te pawh an phur thar anga, an mamawh leh hma lak tum tak leh eizawnna atana loan lak tum te tan bank in phur zawkin loan an pe dawn a ni, a ti a. Training tur te chu hma an lakna tur theuh a beidawnna tel lova tumruhna leh mahni inrintawkna nen tangkawpa an hma lam hun a eng zawnga thlir a, tan la turin a fuih a. Tangka dawn chauh hi dinchhuahpui theih ani lo tiin hlawhtling tur chuan mahni rilru leh thinlung buatsaih a ngaih thu a sawi bawk a ni.

Vawiina Training hawnna programme hi Pi Saikungi, DVIO, MKVIB chuan kaihruaiin Pu C. Malsawma, DUDO Office chuan training kalhmang te a sawi a. Training ah hian Kolasib khawchhunga Trade hrang hrang thlang mi 44 SEP atana thlanchhuahte an tel a, Training hian December ni 9 thleng a awh anga. Group dang thlanchhuahte hnenah December ni 10 atanga December ni 12 thleng training buatsaih a ni dawn bawk a ni.