No.644/2020-2021

Vawiin khan Dr H Lalthlangliana, DC Kolasib district chuan Covid-19 hri laka inven nana ramri dep a duty-te leh Kolasib district chhung khaw thenkhat a Village Level Task Force duty te a tlawh kual a. An harsatna hmachhawn mek te leh harsatna awm thei te sawiho niin a sutkian dan tur te a sawipui a. Vairengte leh Bairabi screening point a mihring phuh thianghlimna chamber leh Vehicle sanitization point te hman theih turin a hawng nghal.

Dr H. Lalthlangliana chuan Vairengte, Phaisen, Buhchangphai, Bukvannei, Saihapui 'K', Thinglian, Pangbalkawn, Chhimluang, Meidum, Rastali leh Bairabi Village Level Task Force te kawmin anni hian an duty-na a harsatna an tawh leh mamawh te an lo thlen a. An khaw chhunga ei leh bar leh duty te mamawh hrang hrang te chu Zonal Executive Magistrate te hrilh thin tur leh anni kaltlanga ruahmanna siam a nih thin tur thu DC hian a sawi. Ramri dep leh khawchhunga duty te inpeknaah DC chuan lawmthu sawiin an thawhrimna fakawm a tih thu a sawi a. Covid-19 hri avangin harsatna eng chen nge kan hmachhawn dawn tih hriat a nih loh avangin hmathlir thui tak nei chunga inpuahchah thiam turin Dr H. Lalthlangliana chuan VLTF hruaitute chu a chah a, Kolasib district chhungah thalai tlawmngai, a tul huna duty hah zual te chhawk thei tur a ruahmanna siam mek a nih thu a sawi. DC chuan screening point a Motor kah thianghlimna chu hun engemawchen enchhin a nih hnuah vawiin atangin uluk tak leh ngawrh takin Gate kaltlang motor zawng zawng te chu kah thianghlim vek tur a nih thu sawiin, Covid-19 laka kan him theih nana kan zawm tur pawimawh, mask vuah, kut silfai ngun, mihring punkhawm loh leh Hand Sanitizer hman te tha tak a zawm tlat turin a chah bawk a ni.

Village Level Task Force hruaitute chuan ruihhlo zawng a ramri kan tum an awm thin thu te, ramri dep a duty ten thawmthat an mamawh zia te sawiin, check gate a phalna nghaka lirthei tangkhang thahnem tak awm thin chu khawtlang tan a him tawk lo ni a an hriat thu te DC hnenah hian an lo thlen a, hemi chungchangah hian ruahmanna felfai tak siam turin an ngen a ni.

An mamawh lo thlen thenkhat chu a tul anga bawhzui nghal niin ramhnuai a duty te hman tur Solar light engemaw zat Pu Vanlalfaka Ralte, SP Kolasib in VLTF thenkhatte hnenah a hlan nghal a. Dr Lalhlimpuia, CMO chuan Covid-19 chungchang a hriattur pawimawh inzirtirna leh fimkhur tulna hrang hrang inhrilhhriatna hun hmangin ramri dep a riak te chu malaria leh natna dang lak a fimkhur turin a chah a. An hman turin damdawi a chiah thosilen pekchhuah a nih thu leh an mamawh ang damdawi te pawh ruahman zel a nih tur thu a tarlang bawk a ni.

Vawiin Kolasib district a Village Level Task Force tlawhchhuahna ah hian Pu Vanlalfaka Ralte, SP, Dr Lalhlimpuia, CMO, Pu Isaac C Lalrempuia, SDO (C) Vairengte, Pu Hmingthanzuala, DIPRO, Pu C Liankunga, President, Sub-Headquarter YMA, Kolasib leh MJA, Kolasib hruaitute leh Zonal Executive Magistrate theuh ten an telpui a ni.

VLTF te hi Vairengteah hmun 17, Phaisenah hmun 8, Buhchangphaiah hmun 8, Bukvanneiah hmun 4, Saihapui 'K' ah hmun 2, Thinglianah hmun 6, Pangbalkawnah hmun 2, South Chhimluangah hmun 2, Meidumah hmun 2, Rajtali-ah hmun 2 leh Bairabiah hmun 28 ah duty mek a ni.