No.646/2020-2021

Vawiin khan Union Minister of Road Transport & Highways changtu Pu Nitin Gadkari chuan COVID-19 hrileng kara mipui him tlan na tura transport kalpui danah leh, highway lama state hrang hrang dinhmun sawipuiin video conference a buatsaih a. Hetah hian state leh UT tin a PWD leh Transport changtu minister te an tel a. Mizoram Chief Minister Pu Zoramthanga pawh PWD changtu a nih angin he meeting-ah hian Transport Minister Pu T.J. Lalnuntluanga nen an tel a ni.

Meeting-ah hian Ministry atanga sawihawnna neih hnuin state hrang hrang te chu thusawi tura koh an ni a. Mizoram Chief Minister chu thusawi tura koh hmasak ber niin, Pu Zoramthanga chuan National Highway a hmalakna khaihlak mek chhunzawm tul thu te, Mizoram sawrkar in a kawng siam chungchang thu a rawtna chi hrang hrang Ministry a lo thlen tawh chungchang te a sawi a.

Transport chungchangah Chief Minister chuan Mizoram chu state dang motor lian thil phur ten kaltlangna atan an hman loh avangin kan vanneih thu a sawi a. Kan mamawh chin chiah motor intir a, kan duh chin chiah motor control thei a state kilkhawr a kan awm hi lehlamah chuan a vanneihthlak hle a ni, a ti a. Hemi a nih avang hian road transport avanga natna hrik inkai darh hlauhawm chungchangah pawh Mizoramin harsatna kan neih lutuk loh thu Chief Minister chuan a sawi. Chutih rual chuan ramri venhimna hna uluk taka kalpui chhunzawm zel a tul thu leh, Mizoramin he COVID-19 donaah hian mipuite an tan nasat zia te, an lungrual tlan thu leh State dangte tan pawh a entawntlak a nih thu Chief Minister chuan a sawi a ni.

He meeting-ah hian Chief Minister dang pahnih leh Deputy Chief Minister te bakah Minister te an tel bawk a. Mizoram Chief Minister leh Transport Minister bakah hian PWD leh Transport Department a officer liante he meeting-ah hian an tel a ni.