No.351/2020-2021
Vawiin khan Dr H Lalthlangliana, Deputy Commissioner, Kolasib district chuan Covid-19 hri lak a inven nana Vairengte Screening gate a hmalakna leh Saiphai, Saipum, N. Hlimen, Thingthelh, Bukpui, N. Chaltlang, Lungmuat, Nisapui leh Serkhan Village Level Task Force duty te a tlawh.
Vairengte Village Level Task Force a hotu thenkhat te nen Vairengte check gate-a lirthei bungraw phur, phalna nghaka tangkhang engemaw zat innghak khawm thin chu a him tawk loa an hriat thu leh a chinfel theih dan tur sawiho a ni a. Dr H Lalthlangliana chuan ramri a lirthei tangkhang awm loa, him taka tlan tlang tir zung zung an nih theih nan Screening point siam belhna tur te leh lirthei leh bungraw thenkhat tih thianghlimna (disinfect) hmun tur ruahmannate pawh duan fel a nih tawh thu a sawi a ni.
Saiphai Village Level Task Force te hnathawh dan enpuiin ram pum inkharkhipna kalpui chhunzawm leh tur atana inpuahchahna tha neih a tul thu leh inkharkhipna thlah dul a nih hnu thleng pawha ramri inkalpawhna hmun chu fimkhur tak a hun engemaw chen vil a la tul thu DC hian a sawipui a. Chief Minister Relief Fund atangin VLTF puihna tur pawisa a hlan nghal a, duty-ten mamawh an lo thlen angin silpouline 2 a pe tel bawk a ni.
Saipum Village Task Force duty te tlawh nghalin DC chuan duty-te chu khawtlang tana harsatna awm si loa fimkhur thiam turin a chah a, thlai chi thlak hunlai te a nih angin huan leh loneitute chu hnathawk thei tur a ruahmanna siam sak a pawimawh tih a sawipui bawk a ni.
N.Hlimen Village Level Task Force tlawhin duty kalpui dan tlangpui te sawiho a ni a, Executive Zonal Magistrate Pu J Rothanga, DAO, Kolasib chuan loneitute leh ran vulh lam a hmalakna te chu fimkhur tak si, inhawng tak chung si a kalpui theih tur a ruahmanna siam a tul thu a sawi a,
DC chuan Saiphai, Saipum leh North Hlimen VLTF te kutah CM Relief Fund atanga pawisa ruahman te a hlan a. Thingthelh, Bukpui, N.Chaltlang, Lungmuat, Nisapui leh Serkhan Village Level Task Force te hnenah Zonal Executive Magistrate kaltlangin CM Relief fund hi hlan an ni bawk.
Vawiin Kolasib DC kaihruaina hnuai a Village Level Task Force te tlawhchhuahna ah hian Covid-19 hri lak a inven nana thil hriattur pawimawh te inhrilh nawn leh a ni a, thlai tharchhuah kawnga harsatna a awm loh nan Task Force-te nen thawhhona tha neih a pawimawh thu sawi lan a ni bawk. He lai tlangdung khua te hi kawng tha takin a paltlang a, Mizoram tana kawngpui pawimawh, mamawh hrang hrang chawk luhna kawng a nih chhoh mek avangin khaw mipuite pawhin rilru zau tak pu zel turin Dr H Lalthlangliana chuan khawtlang hruaitute a chah. Social media hman sual thatlohzia sawi a ni a, thu belhchian dawllo thehdarh lo tur a inzirtir te, thu ziah leh sawi dan ah fimkhur tlan a ngaih thu inhrilhriat a ni bawk.
Pu Isaac C Lalrempuia , SDO(C), Vairengte, Pu C Vanlalvena, Addl. SP, Pu Hmingthanzuala, DIPRO ten DC hi an tawiawm a. Kolasib district tana CM Relief fund atanga Village Level Task Force te tanpuina tur sum ruahman te chu vawiin hian Zonal Executive Magistrate te kaltlang a semchhuah a ni.
