No.3326/2021-2022

Aizawl the 9th December 2021: Vawiin khan Dr.H.Lalthlangliana, Deputy Commissioner, Kolasib district chuan Kolasib khaw chhunga Two Wheeler hmanga infiamna tuimi intelkhawm 05 Youth Bikers, Kolasib Racing Team leh MX Mizo pawl hruaitute a pisaah koh khawmin khaw chhunga boruak muanawm a awm theih nan dan phal chin aia ri bengchheng siam thei proton hman khuahkhirh dan tur a sawipui.

Dr.H.Lalthlangliana chuan Two wheeler khalhtute zingah midang tan a hnawksak khawp a, dan phal bak a ri bengchheng siam a Proton vuah an awm thin thu sawiin hei hian khawchhung hmun thenkhat ah, mi mut reh tawh hnu ahte midang tan harsatna a siam thin thu a sawi a. Lirthei khalhtute chuan dan hnuai a mawhphurna an neihte an hriatchian a an zawm a pawimawh thu a sawi bawk a ni. Deputy Commissioner chuan a tul dan a zirin Kolasib khawchhungah Two wheeler ri bengchheng dap chhuah thin a nih tur thu leh National Highway hmun thenkhat a intlansiak huaihawt a ni thin pawh Duty siam a khap a nih tur thu a sawi a, hetiang tilui man an awm an nih chuan dan anga hrem an nih tur thu a sawi bawk a ni.

05 Youth Bikers, Kolasib Racing Team leh MX Mizo pawl hruaitute chuan boruak muanawm a awm theih nan midang tan a harsatna siamtute dap chhuah kawngah sawrkar hmalakna an thlawp thu an sawi. 05 Youth Bikers ah hian inziaklut mi 40 vel awmin Kolasib Racing Team-ah mi 20 leh MX Mizo ah hian mi 20 vel inziaklut an awm bawk a ni.

Thutkhawmnaah hian Pu Lallawmawma, Addl. DC, Pu Vanlalchhuanawma Chawngthu, SDO(S), Pu B.Lalchuangkima, DTO leh Pu Hmingthanzuala, DIPRO-te an tel a. DTO office-ah Two wheeler khalhtute tan dan inhrilhriatna leh lirthei endikna hun neih nghal a ni bawk.