No.3327/2021-2022

Aizawl, the 9th December 2021: Vawiin chawhm khan Conference Hall, Mizoram Legislative Assembly –ah Lehkhabu pahnih Daingul – I leh Daingul- II, Thu leh Hla lama Zoram Miril pahnih Rokunga leh Zikpuii Pa (KC Lalvunga) kutchhuakte zirzauna chu a duh apiang te chhiar theih turin Speaker Lalrinliana Sailo chuan a tlangzarh.

He lehkhabu te hi Mizo Department leh Research & Consultancy, Government Hrangbana College in a buat saih a ni a. Daingul - I chhungah hian Rokunga Hlate zir zauna ziah a ni a; Daingul – II chhungah hian Zikpuii Pa Thu leh Hla zir zauna te a awm bawk a ni.

Daingul – I leh Daingul – II lehkhabu tlangzarhtu chuan thuziak leh thuziakmite hlutna sawiin hnam anga min phuarkhawmtu leh kan nihna hnam dang te laka min ti chiang tu an ni a ti a. Zofate zinga miril pahnih te chu Kristianna avanga thingbul, lungbul be hnam atanga hmasawnna kawng Zofaten an zawh tan lai mek a mi bik, zofate zirtiru atana Pathianin a lo dah te an ni a ti. Pu Rinliana chuan Zohnathlak hnam hrang hrangte chu khawvel hmun hrang hrangah kan awm darh nasa tawh a. Heng Zohnathlak hnam peng hrang hrang te hian unau kan ni tih kan pawm vek tawh a. Hnam anga kan ropui leh zualna tur leh kan inpumkhatna a lo ngheh telh telh nan tawng pakhat erawh kan neih a ngai tih a sawi a. Tuna Mizo Tawng kan hman mek hi a hmangtu an tam ber a; he Tawng hmanga thuziakmiten hnam inpumkhatna leh inunauna ti nghet zual zel turin mawhphurhna sang tak an nei a ni a ti.

Mizo Academy of Letters(MAL) bul tumin Poet of the Century leh Writer of the Century atan kum 2000 khan Rokunga leh Zikpuii Pa te chu thlan an ni a. Heng miril pahnih te pual hian Mizo Department leh Research & Consultancy, Government Hrangbana College chuan Five Days International Webinar on Twentieth Century Mizo Literature a huaihawt a. He huna zirbingna huanga thuziak thehluh te atangin heng lehkhabu tha tak tak pahnih hi a lo piang a ni. Daingul –I chhungah hian mithiam ten Rokunga thu leh hla zir zauna an ziah thuziak 14 a awm a. Daingul – II chhungah hian Zikpuii Pa thu leh hla zir zauna mithiam ten an buatsaih thuziak 15 a awm thung a ni.

Daingul – I leh Daingul – II tlangzarh inkhawm tawi hi Pu Darchuailova Renthlei, Assoc Prof, GHBC in a kaihruai a. Pu H. Lalawmpuia, Asst Prof, GAWC chuan Daingul –I chhung thuah kamkeuna a nei a. Hruaitu hian Daingul –II chhunga thu inziak te tawi teiin a sawihawng thung a. He hunah hian Rokunga leh Zikpuii Pa chhungte lam atangin thusawi ngaihthlak a ni bawk a ni.

Attachment

  • Loading attachment...