No.4360/2021-2022

Aizawl dated 22nd March 2022: Vawiin chawhnu khan ‘Ground Water – Making the Invisible Visible’ tih thupui hmangin ‘World Water Day 2022’ chu Public Health Engineering Department, Kolasib Watson Division chuan a buatsaih a. Dr.H.Lalthlangliana, Deputy Commissioner, Kolasib chu khuallian niin Er.H.Lalsiamliana, Sr. Executive Engineer chuan hun a kaihruai a ni.

Khuallian Dr.H.Lalthlangliana chuan tui chu a thlawn a kan dawn, a tel loa khawsak theih si loh a nih avangin a hman kawngah pawh inrenchem thiam tak chung leh dahkhawl leh vawnthat ngaih pawimawh tul tak a nih thu a sawi a. Tui hna humhalhna kawng pawimawh tak chu ram ngaw humhalh a nih thu tarlangin huan, lo, ram kan enkawl dan kalphung a ram ngaw thiah a ngai thin chu pawi a tih thu a sawi. Kum tin thingphun uar chhoh a tul thu sawiin kan thingphunte enkawl puitlin pawh ngaih pawimawh tel a tul thu a sawi bawk a ni. Ni tin khawsak hautak chho zel chhawk zangkhai a nih theih nan Dr.H.Lalthlangliana chuan tunlai thiamna a tak a hman tangkai thiam a pawimawh thu sawiin ruahtui khawl leh eng chhit nana ni zung chakna hman chu intihhmuh zel a that thu a sawi a, kan tui tlante a thianghlim theih nan kan lui leh tui hnar ahte bawlhhlawh paih mai mai lo turin kalkhawmte a chah bawk a ni.

Er.Lallawmpuia Sawthly, SDO chuan tui renchem a pawimawhna leh lei hnuai tui humhalh a tul zia Powerpoint presentation hmangin zirtirna a pe a. Mizorama PHED hmalakna hnuai a lei hnuai tui verchhuahna hmasa ber chu kum 1989 a Thingsulthliahah a nih thu leh Mizoram puma lei verhna hmun 2000 chuang awm mek ah 669 chu a tak a hman mek a nih thu a tarlang. Mizoram puma lei hnuai a tui tling khawm zat chu 0.04 BCM anga chhut zingah za zela 0.90 la chhuak tawh anga chhut a nih bawk thu a sawi a. Kan tui hna neih sate humhalh a, chhungtinin tui inrenchemna uar zawk a kalpui a, bawlhhlawh hlauhawm lak a kan luite vawnthat a nih a ruah tui khawl that a nih bawk chuan tui a kan harsatna chu nasa taka a ziaawm phah tur thu ngaihthlak a ni bawk a ni.

Kolasib a ‘World Water Day 2022’ pual a ‘Tui hna humhalh’ tih thupui hmanga lemchan intihsiakna lawmman semna neih niin YMA Vengthar Branch, Kolasibte chuan pakhat an hauh a, lawmpuina thuziak leh pawisa fai cheng singthum an dawng a. YMA Hortoki Branch chu pahnihna niin YMA Diakkawn Branch chu pathumna an ni bawk a ni. Heng bakah hian Best Director, Best Actor, Best Actress, Best Script writer leh Participation prize-te sem a ni bawk.