No.4361/2021-2022

Aizawl, the 22nd March 2022 : Information & Public Relations changtu Minister Pu Lalruatkima'n vawiin khan Information & Public Relations Department, Mizoram Film Forum (MFF) leh Ailawng khawtlang te thawhhona leh hmalaknaa siam Ailawng Film City a hawng a. Film City Peng pakhat film shoot/siamna atana set-a hman theih tur Zokhua hawnna programme chu khuallian niin a hmanpui zui nghal a ni. Film City hawnna programme-ah hian Pi Lallianpuii Director, I & PR chu khualzahawm a ni.

Information & Public Relations changtu Minister Pu Lalruatkima chuan khawvel inlum letin hmasawnna hrang hrang a ken chhoh zingah film chu thil pawimawh tak, khawvela hnam hrang hrang ten an hnam tihdan leh nunphung inhriatpawhna hmanrua a nih thu a sawi a. Film siamah hmasawnna a awm theih nan a mawhphurtu Nodal Department te awmin Sawrkar chuan film siamna kawnga hmasawnna a awm theih nan theihtawp chhuahin tan a la chho mek tih a sawi a ni. Ailawng khawtlang chuan hmathlir thui tak neiin Film City ruahmanna tihpuitlin kawngah theihtawp an chhuah a, an ram te phal takin an sahthlak a, Film City atanga an khua hman an phalsak te chu lawmawm tiin a neitu an nih anga him taka enkawl turin a chah bawk a ni.

Minister chuan Mizo hnam chu hnam naupangte, Mizo film hmasa ber pawh kum 1983 siam a ni chungin tunah chuan thalai tam tak ten film siamna leh a kaihhnawih luhchilhin chak takin ramdangte rualin ke kan pen mek niin ka hria a, hei hi a lawmawm a, rim taka thawk te leh tih tak zetna nena film buaipuitute tan tunah chuan film siam hi eizawnna tling a ni tawhin ka hria, a ti. Sawrkar flagship programme SEDP chu a dawngtu tan beneficiary oriented leh a mamawhtu duhdan demand driven a nih angin film leh painting te hi trade ah dah a nih theih nan ruahmanna siam tel a nih tur thu a sawi.

I & PR Director Pi Lallianpuii chuan Ailawng Film City tobul sawiin Ailawng khaw pum leh a chhehvel chu film shooting hmuna hman theih tura buatsaih chu a tum ber a ni a, Mizo zia leh khawtlang nun pholang thei tura duan chu a tum pawimawh tak a nih thu a sawi. Film lamah technology a danglam dan sawiin OTT platform LPS in nakin lawka an chhawpchhuah tur chu Mizo film siamtute tan sum leh pai bakah an talent zau zawka phochhuahna kawnga thil tangkai tak a nih a beisei tih a sawi bawk.

Ailawng Film City hawnna Zokhaw tuala neihah Pu C. Lalnunkima, Joint Director, I & PR chuan inlawmna hun hmang in Pu V. L. Zote, Secretary, MFF in Ailawng Film City leh he ruahmanna hnuaia pawl thil sak leh siam te a sawi a. MFF Chairman Pu Lalawmpuia Khiangte, MFF Patron leh Mizo film siamna kawnga sulsutu Pu Lalsawmliana Pachuau leh Pu Lalthlamuana, Vice President, Ailawng VC leh Chairman AVEDSOC ten thusawina hun an nei bawk a ni. Upa Sangzela chuan Pathian hnenah inhlanna hun hmangin Pu Aldrin Zosangliana Vice Chairman, MFF in lawmthu sawiin hun a khar a ni.

He hunah hian Ailawng khawtlang hruaitute, Department officer leh staff te bakah MZU a Mass Communication & Journalism Department zirlai leh zirtirtute leh Indian Institute of Mass Communication (IIMC) Aizawl Regional Centre Director Pu LR Sailo leh zirlai te an tel a ni.

Kum 2018 khan Ailawng khawtlang te nen inbe rawnin Department leh MFF te chuan film shooting neihna atan Ailawng khawtlang leh a hmunhma te chu Ailawng Film City a puan ni se tia relin thawhhona an ziak a. Sawrkar hmasain NEDP atangin a sakna tur sum an ruahman a. Ailawng ram chhunga Zokhaw sak zawh tawh chu vanduaithlak takin January 2021 khan a kangral vek a. Hetah hian hmanlaia khaw awm dan mila sak di in 16 chuang a kangral vek a. Hemi hnu hian hmathar la lehin Zokhua hi sak thar leh a ni a. A sak thar lehna senso hi mimal thilphal te sumthawh khawm leh pawl sum tlingsa atanga tih niin cheng nuai 8 chuang sen a ni. Zokhua leh a chhehvel ram hi bigha 3 vela zau a ni.

Film facilities atan Zokhaw bulah hian Mizoram Film Forum Film Facilitation Centre Assam type building a awm a, Ailawng Hall chu Khuangchera Theatre cum Multipurpose Hall ah puan niin Hall hi film chhuahna atan a hmun hma te cheibawl a ni a. Zokhua hi a duh apiang tana tlawh theih niin naupang tan luh man cheng 10 leh puitling tan cheng 20 a ni a, kum 55 chunglam tan erawh luh man chawi a ngai lo.

Hawn hma pawhin helai hmun hi Mizo film engemaw zat bakah Bollywood production company pakhat JAR Productions ten shooting neih nan an lo hmang tawh a. JAR Productions hian nikuma shooting an rawn neih khan Mizoramah cheng nuai 90 bawr vel an hmang niin MFF chuan an sawi a. Bollywood film chhuak tur ‘Sam Bahadur’ siam mektu Meghna Gulzar leh a team te chuan tun thla chhungin Mizoramah audition an rawn nei dawn a, he film a Brig T Sailo lema chang tur Mizo thlalai an rawn thlan dawn bakah shooting neih theihna tur hmunhma te an rawn dap dawn tih MFF lamin an sawi bawk a ni.

Thawhhona thuthlung angin Ailawng khaw mipuite chu film shooting lamah an thawh theih ang ang thawh tir zel an ni a. Khawtlangin neitu nihna leh a hlawkna awm thei te chang chungin Department leh MFF te an thawhpui zel a ni. Ailawng leh a chhehvelah hian film shoot-na hmun hrang hrang Ecotourism project te tiamin, hmunhma dangte pawh a awm nual a. Film shoot-na tur bungrua leh thawmhnaw hrang hrang te hawh theih turin helai hmunah hian a awm bawk a ni.

I & PR Department hian film lam tihhmasawn nan MFF te, arts leh painting ah Mizoram Artists Development Society (MADS) leh Photography lamah Mizo Photographers Society (MPS) te thawhpuiin hmasawnna duhawm tak tak a awm tawh a, ruahmanna hrang hrang te pawh a kal zel mek a ni. Chanchinbu leh thuthar thehdarhtu hamthatna atan Mizoram Journalists' Welfare Society (MJWS) kaltlangin an damloha inenkawlna senso leh an boral n ralna sum ruahman thin a ni bawk.