No.4362/2021-2022

Aizawl the 21st March, 2022: Khawvel pum huapa hman World Water Day chu vawiin khan Aizawlah pawh Chief Minister Pu Zoramthanga hovin Chanmari YMA Hall-ah PHE Department leh Central YMA tangkawp buatsaihin hman a ni. Kumin World Water Day thupui chu “Groundwater, making the invisible visible” (Leihnuai tui: Hmuh theih loh kha hmuh theihah) tih a ni.

Chief Minister chuan mihring nunna atan tui pawimawh zia leh mipuiin tui thianghlim kan mamawh tawk hman tur kan neih theih nana tui humhalh kawnga kan harh thar a, kan thiamna leh remhriatna te kan hman thiam a tul zia a sawi a. Kumin World Water Day thupui pawh pawimawh a ti a ni. Chief Minister chuan economy hmasawnna leh environment humhalh hi kal kawp theilo anga ngaih fo a nih thin thu a tarlang a. Ram harsa zawk te, hmasawnna lama hnufual zawk ten an khua leh tuite tana dinhmun tha zawka hlangkai tura hma sawn tur ke an pen a tul thin a. Mahse thu neitu sang zawk, a changkang hmasa zawkte atangin humhalhna kawnga tih leh tih loh tur, ram harsa zawkte economy development tithuanawp thei thil a awm chang te a sawi a. Hmasawnna leh thing leh mua, nungcha leh tui hna humhalh chu a kal kawp theih thu a sawi a. Sawihona leh inrawntawnna, infianchhuah leh inhriatthiam tawnna erawh a tul thu a sawi.

CYMA President Pu R. Lalngheta pawhin thu sawiin, tuna la dam ten tui thianghlin in leh hman tur kan neih theih nan chauh nilo, chhuan lo la awm zel turte pahin an neih theih nana tuna hma kan lak tan hi a pawimawh a ni, a ti. Ram leh hnam tana thawhhona kawngah sawrkar leh YMA chuan thawhhona tha tak an lo neih fo thin chungchang a sawi bawk a. Sawrkar department thawktute chu ram leh hnam tana thanhnemngai tak tak an nih thin avanga YMA hruaitu te pawhin thawhpui an thiam a pawimawh thu te, chutiang ang bawkin YMA chu hnam anga Mizote insuihkhawmna a ni tih rhiaa sawrkar hnathawkte pawhin YMA a hman tangkai thiam tul a tih thu a sawi a. Thawhhona thuthlung te hi ziah ah duhtawk mai lovin, mahni zawna tih tur theuh thahnemngai taka bawhzui tlang ila, a ti a ni.

Vawiin inkhawm hi Er. C. Lalremsiana, E-in-C, PHED chuan a kaihruai a. Director WSSO, PHED Er. Chawnghnuna chuan WWD 2022 chungchang a sawi bawk. Leihnuai tui (Groundwater) pawimawh dan zirchian naahKhawvel pum huapah inchhung khawsak naah 50%, lo, huan leh leilet chawmna irrigation atan 40%, leh industry sector-ah 30% hman a ni a. Groundwater hi tui thianghlim kan hmuh theihna tha tak a nih rualin hnawhkhah (recharge) leh turin pawnlam atanga lakluh leh zel a ngaih thin thu te, chung atan chuan ngawr dur tha tak neih pawimawh thu te vawiin hian tarlan a ni.

Pu Mohan S. Konwar, Rotary District 3240 Governor hnen atangin thusawi tawi ngaihthlak a ni bawk a. Ani hi khawvel huap organixation pakaht, Rotary International hnuaia thawk a ni a. Tui thianghlim hnianghnar a a mamawhtuten an neih theih nana an pawl hmalakna te a sawi a. India state tam taka ‘watershed management’ leh ‘springshed management’ kalpui a nih thu te a sawi. Vawiin inkhawm hi ‘Chief Engineer Er. H.C. Lalnunzira chuan lawmthu sawiin hun a khar a ni.

World Water Day 2022 pual hian intihsiakna chi hrang hrang paruk buatsaih a ni a. A titha thlanchhuahte hnenah vawiin hian lawmman – pawisafai leh certificate sem nghal a ni. Intihsiakna category hrang hrangte chu:

A. SMS Slogan competition:
1) R. Lalhmangaiha, Zemabawk, Aizawl
2) Hmingthansanga, Serchhip Vengchung
3) H. Hmingthankhuma, Bethlehem Vengthlang

B. Poems / Hla inphuah siak
1) C.T. Lalmuankima, Durtlang Leitan
2) C. Lalhunsangi, Buarpui
3) H. Lalchhandama, Ngopa Chhim veng

C. Drama writing Competition (min 10)
1) J. Lalnangliana, Chanmari West, Aizawl
2) C. Lalhmungsangi, Buarpui
3) Lalhmachhuani, Durtlang Leitan

D. One page comic design
1) Benjamin Lalbiakhlua, ITI Veng
2) Ramnunsanga Sailo, Dinthar, Aizawl
3) Francis Lalramdinngheta, Chawnpui, Aizawl

E. 55 seconds advertisement video
1) PK Lalruatzena, Thanglailung
2) Joseph Lawma Hazau, Bethlehem Vengthlang
3) Malsawmtluangi Khiangte, Kanan

F. Social Media challeng (kumin atana tih thar)
1) Tekawnga Pa Tuikhur Committee, Kulikawn, Aizawl
2) R. Zomuankima and friends, Champhai Bethel veng
3) (i) Save the father planet, Chawnpui
(ii) Stephen and friends, Dinthar
(iii) SUB Team, Kikawn Bazar Veng, Lunglei
(iv) Petros Ream, Bungkawn High School Veng
(v) Pasaltha Neuva Thiante, Durtlang