Nimin 5^th October, 2012-a Silchar Circuit House-a Kolasib DC Pi Niharika Rai, IAS leh Cachar DC Pu HD Mahanta, IAS te  State pahnih inkar boruak hrang hrang - tunhnaia ILP leh ramria Pillar phun chungchang thua inbiate chuan englai pawha ramri intawm leh in thenawm kan nih avangin kan inunauna titha turin theihtawp kan chhuah zel tur a ni, an ti a. Kawng engkimah inrawn tlanga India Danpui in a huam chhung ngeiah  hma lak ho zel nise an ti a ni.

Meeting-ah hian ramria Pillar phun chungchang leh tih chhiat a nih chungchang te, tunhnaia Lailapur a road block neih leh temporary ILP/work permit ngiata mi 300 hming ziah chungchang te  sawi a ni a.

Kolasib DC Pi Niharika Rai chuan ramri a Pillar phun chungchangah leh mi tuten emaw anlo thiah chungchangah thil punlun chak tak leh mite benghawlh tak a nih thin avangin inbiak rawn hmasak phawta thiltih ngai a ni, a ti a. Sawrkar levela thiltih a nih lohva, Media lama alo lan hian boruak a ti punlun thin a. Chuvangin tun chinah hetiang thil pawimawha thiltih a nih dawn chuan sawrkar level-ah mumal taka indawr nise tiin a rawt a. Hei hi zau taka sawi  hovin tun atanga ni 15 chhung ngeiin Joint Verification neih nise, hei hi Kolasib  leh Cachar DC hovin Forest leh Police hotute ve vein an ti ang a, chuta report chu Cachar DC ah thehlutin chumi hnuah Kolasib DC in sawrkarah a thlen ve leh ang, an ti a ni.

Temporary ILP chungchangah zau zawka hriatthiamna ngiata tun hnaia Labourer 300 zet inziak lut te chungchang saizau hnuah – Tun atang chuan Dholai Police Station-ah Job Register dah nise, chu chu endik a nih hnuah SDO (Civil) Vairengte-ah pek chhoh a ni anga. Chung hming Registera chuangte chu Sponsor an neih dana zirin Temporary ILP pek an ni ang. Tun hnuah ILP check chu Police leh Magistrate chauhin ti tawh se an ti bawk a ni.

OC Dholai leh OC Vairengte te chu thlatin meeting nei thin se, an ti a. DC Kolasib leh Cachar tepawhin a hmaa thutlukna anlo siam tawh Quarterly a meeting thin nise an tih chu chhunzawm zel nise an ti bawk a ni.

Hun lo kal zelah inthian thatna leh inunauna zawnga hma lak zel an tum thu DC pahnihte hian an sawi a. Hun reilote ah Cultural Meet, Kolasib-a neih an rel a. Kumin February 9, 2012 pawh khan Friendly Football Match, DC Kolasib XI leh DC Cachar XI ten Silchar-ah anlo khel tawh bawk a ni.

Karimganj DC pawh he inbiaknaah hian a tel a. Kolasib lam atang hian SP Pu Madhur Verma bakah Officer engemaw zat an tel a. Cachar lamah pawh SP Pu Diganta Barah leh Officer thahnem tak an tel a ni.