Sharif Uz Zaman Laskar, General Secretary, North East Congress Co-ordination Committee kaihhruai, Barak Valley Peace Delegation invuahte chuan vawiin khan Chief Minister Pu Lal Thanhawla chu a chenna bungalow ah hmuin, ramri chungchang leh kan inkungkaihna a thil pawimawh chi hrang hrang an sawipui.

Chief Minister chuan ramri chungchang chu  state pahnih te leh central sorkar chinfel tur a ni a, a chinfel hna hi  hun duh rei anih avangin harsatna awmte chu dawhkan kila sawifel a tha ber a ni a ti a. Mizo leileta ramri lung phuntu leh tichhetute chetdan chu mi dawizep hna a ni tiin, ramri a innekna awm thin hi tumahin an ti tur a nilo a ti. Chief Minister chuan ramri chungchang chu thuneitu sangah sawipui a tum thu a sawilang bawk.

Vairengte ah ILP ngai lova inhlawh chungchang Peace Delegation member ten an sawi chu Chief Minister chuan hun rei tawh tak atanga kalpui thin chu kalpui chhunzawm zel a tha ber a ni a ti a. India khua leh tui vek kan ni a, inzah tawn leh indip lova kan khawsak tlan hi kan duh ber a ni a ti. Hindustan Paper Mill,Cachar chungchang an sawiah Chief Minister chuan mau hi national asset a ni a, tangkai tak leh thiam taka hman tum anih thu sawiin, mahal system pawh tihtawp a ni a ti a. Mau atang hlawkna tam thei ang ber Mizo ten kan hmuh theih nan Chipping Plant te din a ni tiin, heng chipped bamboo te hi Paper Mill mamawh awm tawk chu pek dan ngaihtuah sak a tiam a ni.

Kan inkara harsatna thleng sutkian zung zung anih theih nan delegation member te chuan Silchar Mizoram Hoause ah Public Relations Officer dah tul an tih thu leh Grievance Cell siam bawk tura Chief Miniaster an ngenna chu ngun takin Chief Minister chuan a ngaithla a. Barak Valley ah leh Mizoramah Integration Camp siamte an rawt bawk a ni.

Delegation hruaitu Sharif Laskar chuan Pu Lal Thanhawla chu mi viak tha, mi hawihhawm, mahni thutiama ding, hotu nih tling a ni a ti a. Hun rei tawh tak atanga a kaihhruaina hnuaia inzir thin anih thu a sawi a. Chief Minister thil sawi tam takah lawmthu sawiin, an mahni lam pawhin mawhphurhna an nei tih an hriat reng a tul a ni a ti a. Thil hrechiang hmasa lova thuthang thehdarh ngailo turin a hraittir bawk a ni.

Delegation memberte hi 21 an ni a. An zinga pakhat hi Gauhati a Minority Students’ aiawha lokal a ni a. Chanchinbumi te leh ukil te pawh an tel a ni. Vawiin vek khan an haw let leh nghal a ni.