Parliamentary Secretary Pu Lal Thanzara, Samaritan Society of Mizoram Patron ni bawk chuan vawiin chawhnu dar 3:00 khan Samaritan Society of Mizoram office, Chanmari ah Samaritan Society te rawngbawlna, khawvel hmun hrang hranga a duh apiang te thlir theih tura website buatsaih chu a hawng.

Pu Lal Thanzara chuan tlawmtea mi thahnemngai ten mi chanhai te tanpuina rilru pu-a Samaritan Society of Mizoram an lo din chu chhuanawm a tih thu a tarlang a. Mi harsa te tanpui mai bakah ruihhlo lama harsatna tawkte leh HIV/AIDS vei te enkawlna lama kawng hrang hranga hma an lak mekna te chu ropui tiin midang te tana malsawmna an nih zel theih nan Samaritan Society thawktu te hnenah duhsakna a hlan bawk. Pu Lal Thanzara chuan Samaritan Society of Mizoram rawngbawl dan hrang hrang tarlanna lehkhabu a tlangzarh nghal bawk a, Vawiin tlai a website hawnna inkhawm tawi ah hian Samaritan Society-in Mizoram hmun hrang hranga hma an lak dan Project Report te ngaihthlak a ni bawk.