Vawiin chawhma dar 11.00 khan D3 17th Inter-Branch YMA Volleyball Tournament - 2012 final chu Electric Veng YMA Hall-ah khelh a ni a. Hmeichhia-ah Bungkawn Branch YMA chuan an khingpui Vaivakawn Branch YMA chu 25-14, 25-16, 21-25, 25-18 a hnehin an Champion a. Mipa-ah Kulikawn leh Hunthar Veng Branch YMA ten final an khel a; Kulikawn YMA Branch hian 25-21, 25-23, 19-25, 25-20 a hnehin mipa team-ah an Champion a ni. Lawmmante hi Pu T. Sangkunga, CYMA President chuan a sem a ni.

He Tournament kharna inkhawma khuallian Parliamentary Secretary Pu Lal Thanzara chuan, “YMA member-te tana infiamna buatsaih thin hian inkungkaihna tha a siam a, rilru leh taksa tan pawh hriselna min petu a ni” a ti. Mizoram sawrkar chuan infiamna kawnga thalaite tuihalna hriain theih tawp a chhuah mek zel thu a sawi a. “Mizoram-a khelmual pathum ngawt maia sawrkar senso a artificial turf kan phah thei hi FIFA meuh pawhin mak an ti a. Hei hian infiamna kawnga kan sawrkar tanlakna a tarlang a; India rama infiamna peng hrang hranga players hlawhtling kan neih mai bakah Coach hna thawk theite pawh kan pung zel a ni” a ti. Pu Lal Thanzara chuan infiammite chauh ni lovin, mipui nawlpuiin zuk leh hmuama insumtheihna kan neih a pawimawh thu kal khawmte a chah bawk a ni.

17th Inter Branch YMA Volleyball Tournament-ah hian mipa team 47 leh hmeichhe team 26 an chhuak a; 25.9.2012 atang khan khelh tan a ni.He tournament buatsaihna atan hian D3 Business Enterprise chuan cheng nuai khat an thawh a; LT Bros. in cheng singnga an thawh a; Mizoram Volleyball Association-in cheng singnga an thawh bawk a ni. Hei bakah hian entry fee atangin cheng singkhat sangnga leh gate entry atangin cheng sing thum hmuh a ni bawk.