Lunglei Bazar veng ah NLUP 2nd Phase dawngtu tur te tana NLUP Awareness Programme an buatsaih chu Lunglei Bazar Veng Community Hall-ah hlawhtling taka neih a ni a. NLUP Beneficiaries te an kal tha hle a, Pu S. Laldingliana, Parliamentary Secretary chuan he hun hi Khuallian niin a hmanpui.

He NLUP Awareness Programme, Bazar Veng. Community Hall, Lunglei-a neih hi Pu Vanlalsiama, President, Bazar Veng in kaihruaiin Pu Ch. Zasanga'n Pathian hnena inhlanna a hmang a. Pu Zathangliana, SDC/Nodal Officer, (NLUP) chuan NLUP kalhmang leh sawrkar programme a nih anga Deparment lamin hma an lak dan hrang hrangte chipchiar takin a tarlang a. Pu C. Lianmawia, GS, LDCC pawhin kalkhawmte fuihna thu tha tak a sawi bawk a ni. 

He huna thusawitu Khuallian Pu S. Laldingliana chuan Zoram mipui zinga mi nuaikhat leh sing hnih te tuam chhuak turin NLUP hi Flagship Programme atan a kalpui mek thu leh sem tlai a nihna chhan pawh sawifiahin a dawngtu tur mipuite rilru sukthlek leh khawhawi siam felsak phawt a ngaih thu te a sawi a. Remote Sensing Technology nena mithiamte nena tangkawpa hma lak a nih dante a sawi bawk. Pu Dinga chuan, "NLUP min duansaktu Chief Minister Pu Lal Thanhawla kaihhruai, he sawrkar hian Pa in a fa a hmangaih angin mi chanhai zawkte a ngaihsakin a hmangaih em em che u a. He Programme duangtute rilru leh duhdan hre reng chunga taimakna leh tihtakzetna nena ti hlawhtling ngei turin beneficiaries te ka chah che u a ni" a ti. Hengte bakah hian  Sawrkar hmalakna hrang hrangte a sawi lang tel bawk.

Lunglei Bazar veng huamchhungah hian NLUP 1st Phase mi 119 in an dawng tawh a, tunah hian 2nd Phase ah mi 100 in an dawng leh dawn a ni.

Pu S. Laldingliana hian a programme duanlawkte hmang zo fel thawkhat tawhin,  tunkar hi Lunglei ah a la cham anga, kar leh thawhtanni ah Aizawl lam panin a phei tawh dawn a ni.