October ni 1 a tan, IX PSPB Billiards & Snookers Tournament 2012, Petroleum Sports Promotion Board (PSPB) buatsaih chu nizan khan final khelh a ni a, Chief Minister Pu Lal Thanhawla chuan a hmanpui. 

Chief Minister chuan Mizoramah Billiards game hi kum 1990 bawr chho vela a lo kalpui tawh thin thu a sawi a. Hemi infiamna a Mizo tlangval National Junior Champion a ni thei chu a lawmawm tak zet a ni a ti a. He tournament-ah hian khawvel hriat hlawha mi chhuanawm, world champion vawi tam tak lo ni tawh leh infiamna a India chawimawina sang Arjuna Awards leh Rajiv Gandhi Khel Ratna te lo dawng tawh engemawzah an rawn tel chu Mizoram tan a vanneihthlak hle a, hei hi kan lo beisei ngai loh a ni tiin, Mizo thalaite hmuh theih ngeia an lo tel chu a ropui hle a ni a ti. 

Chief Minister chuan infiamna khawvelah Mizoram chuan a hmunhma leh a ruhrel pawimawhte a din chho mek zel a ni a ti a. Tunhnai maia Cricket Association of Mizoram chu Board of Cricket Control of India (BCCI) in a rawn recognise (hriatpui/pawm) thu a sawilang a. BCCI pawmpuina hian chak leh zuala Cricket Mizoramah a kalpui theih ngei tawh a beisei thu a sawi bawk a ni. 

Khualzahawm Pu Zodintluanga, Sports Minister chuan Chief Minister in thalaite tana nasa taka hma a lak thu a sawi a. Snookers leh Billiards pawh hi a hun hmasa lam atang daih tawha a lo kalpui tawh thin thu a sawilang bawk a ni. 

Tarlan tawh angin he tournament hi petroleum company hrang hrangte tana inelna, inter unit tournament a ni a. Heng Company te hi ONGC, Gas Authority of India Ltd (GAIL), Bharat Petroleum Corporation Ltd, Oil India Corporation Ltd leh Hindustan Petroleum Corporation Ltd an ni a. Tournament hi individual leh team anga inelna buatsaih a ni. Team inelna ah hian Billiards leh Snookers ah ONGC chu Champion Team an ni. Kum 2011 a National Junior Champion Lalrinfela Renthlei pawh Bharat Petroleum Corporation Ltd aiawhin a tel a, amah avanga Aizawla he tournament hi rawn nghat ni a thu dawn a ni.

Attachment

  • Loading attachment...