Nimin khan Kolasib DC leh District Election Officer ni bawk Pu H. Lalengmawia, IAS leh SP Pu C. Lalzahngoa te chuan tunkar Ningani May ni 19 a Village Council Inthlanna(by election) neihna tur khaw paruk - N.Chawnpui, H. Hlimen, Phainuam, Saihapui 'V', Saiphai leh Saipum te an tlawh a. Village Council inthlanna atana inpuahchahna leh venhimna kalpui dan a hmunah an en a, inthlanna felfai leh thianghlima tak neih anih thei nan thil pawimawh leh tul nia an hriat chu Returning Officer te an sawipui a ni.

DC leh SP ten he inthlanna hi tluang, felfai, thianghlim leh muanawm taka neih anih theih nan mipui leh tlawmngai pawl te theihtawp chhuahpui turin a ngen bakah Kohhran hrang hrangte chu tawngtai sak turin a ngen bawk a. DC pawh hian inthlan ni hian Inthlanna nei tur khua te chu a theih theih tlawh a tum thu a sawi bawk.

Saiphai leh Saipum ah te hian Police Outpost a awmsa avangin Police awmsa te hi Election Duty atana rin nghal a ni dawn a, a bak khaw 4 ah te hian police Half Section zel an duty dawn a, anni hian nimin vek khan an duty-na hmun turte an pan tawh a. Heng VC Inthlanna neihna tur khua ah te hian Inthlan hunah Magistrate pakhat theuh in an thutchilh dawn a, naktuk ah heng khua te pan tura beisei an ni.