2683/2023-2024

2023 Sahmulphah thla ni 6: Mizoram Legislative Assembly Inthlanpui, 2023 buatsaih tura Kolasib District chhunga polling station 89 awm zinga polling station dangdai bik (unique polling station) atana cheibawl, Government Chawngfianga Middle School, Saidan, Kolasib-a 5/26-Saidan Polling Station chu tukin zingkar khan Kolasib District Election Officer, 5-Kolasib (ST) Assembly Constituency Returning Officer ni bawk Pu John LT Sanga chuan a hawng.

Kolasib DEO Pu John LT Sanga chuan Govt Chawngfianga M/S chu voter-te hip thei turin ngaw leh nungcha (forest) lam hawia cheibawl a nih thu sawiin, inthlan inbuatsaihnaah official-te'n tih tak zetin an thawk tih lantirtu leh voter-te pawhin an tih tur vote thlak an ngaih pawimawh theih nana cho phurtu atan unique polling station chu ruahman a nih thu a sawi a. Unique polling station bakah hian, intlar ngai lova vote thlak theihna model polling station 1 leh hmeichhe hlang duty-na (all women managed) polling station 10 buatsaih a ni bawk tih sawiin, polling station dang zawng zawng pawh eng, tui thianghlim, inthiarna, ramp leh mamawh dang daha chei ṭhat vek a nih thu a sawi a. Polling station chei ṭhatnaa tha thawhtu election official-te, sawrkar department leh sikula thawktute chungah lawm thu sawiin, unique polling station chu ruahman a nih chhan ang taka hlawhtling taka hman a nih ngei a beisei thu a sawi a ni.

Kolasib-a unique polling station hawnnaah hian Returning Officer-te leh Assistant Returning Officer-te, Kolasib-a Head of Office-te, MPF leh NGO hruaitute, Govt Chawngfianga M/S-a zirtirtute leh zirlaite an tel a. MPF Kolasib District Forum Chairman Rev. C. Lallungmuana'n unique polling station hlanna leh Kolasib District-a inthlanpui buatsaih tur pualin ṭawngṭaina hun a hmang a. Kolasib District SVEEP Nodal Officer Dr Lalramdintluanga, SDC Kolasib chuan unique polling station an cheibawl dan report a pe a. Official-te chuan polling station hmunhma an fang kual nghal bawk.

Govt Chawngfianga M/S-in an sikul hung chhunga sai lim ker (sculpture) an neih sa chu beh chhanin, unique polling station hi forest theme-a chei a ni a. District Election Officer hma laknain sai lim hi chei ṭhata rawng hnawih thar niin, tui chik chhuak reng thei turin fountain siam nghal a ni a. Sikul chung, a bang leh a chhehvel te chu thawm ṭhat ngai lai thawm ṭhain, rawng hnawih thar vek a ni a. Mi hip thei tur zawngin photo booth, lemziak, fountain leh a cheina thil chi hrang hrang siam a ni bawk a. Hei bakah hian, Environment, Forests & Climate Change, Kolasib Forests Division chuan sikul bangah ramngaw leh nungcha lem (mural painting) eng emaw zat ziakin, an chei thar bawk a ni.