2684/2023-2024

2023 Sahmulphah thla ni 6: Naktuk, November ni 7, 2023 (Thawhlehni) hi Mizoram Legislative Assembly Inthlanpui vote thlak ni a nih angin, Kolasib District chhunga assembly bial pathuma polling station 89-a inthlan buaipui tur polling party-te chu vawiin khan Kolasib District Election Officer pisa tual aṭangin an duty-na tur polling station panin an chhuak.

Tukin zing khan Kolasib DEO office-ah Kolasib District chhunga assembly bial pathuma duty tur polling party-te chu kal khawmin, EVM & VVPAT leh an bungraw mamawh turte an lak khawm a, an enfiah leh vek hnuah an duty-na tur polling station ṭheuh panin an kal chhuak a. Mahni duty-na tur hmun pana polling party kal chhuakte hi DEO office tual aṭangin Kolasib District Election Officer Pu John LT Sanga chuan tluang taka an duty-na hmun thleng tur leh an duty-te ṭha taka hlen chhuak tura duhsakna hlan chungin a vai liam a. DEO hi Returning Officer-te, Assistant Returning Officer-te leh Election official dangte'n an ṭawiawm bawk.

Polling party-ah hian Presiding Officer leh 1st, 2nd & 3rd Polling Officer-te bakah, security personnel leh driver-te an tel a. Naktuk zing dar 7 aṭanga tlai dar 4 inkar chhunga inthlan buatsaih turin vawiinah mahni duty-na tur polling station thleng kim tura beisei an ni.

Vawiin hian polling station 26 awmna 4-Tuirial (ST) Assembly Constituency-a duty tur polling party 26, polling station 29 awmna 5-Kolasib (ST) Assembly Constituency-a duty tur polling party 29 leh polling station 34 awmna 6-Serlui (ST) Assembly Constituency-a duty tur polling party 34, an zavaiin polling party 89 chu mahni duty-na tur panin an chhuak kim a. An zingah hian hmeichhe hlang awmna polling party 10 (Tuirial bialah 3, Kolasib bialah 4 leh Serlui bialah 3) an tel a. Polling party chhuak tate bakah hian, a ṭul thulha chhuak ve nghal thei turin thlavenga dah reserve polling team eng emaw zat pawh inralring sain an awm reng bawk a ni.

Vawiin hian Kolasib District-a sector 16-a Sector Officer-te leh critical polling station 7-a inthlan viltu tur Micro Observer-te pawh an duty-na tur lam panin an chhuak ve nghal bawk.