2655/2023-2024

2023 Sahmulphah thla ni 4: Kolasib District Election Officer Pu John LT Sanga chuan vawiin khan Mizoram Legislative Assembly Inthlanpui, 2023 buatsaih tur atana Kolasib District inpuahchahna tlangpui puanzarna leh vote thlak tura District mipuite sawmna video clip a tichhuak.

Kolasib DEO Pu John LT Sanga chuan India ram hi mipui rorelna, democracy a nih angin, mipuiin kan duh zawng hruaitu kan thlang thei hi a hlu hle a ni, a ti a. Inthlanpui buatsaih turin tha leh zung leh sum leh pai tam tak sen a ni tiin, Kolasib District chu inthlanna felfai tak nei turin a inpeih fel tawh tih a sawi.

Kolasib DEO chuan SVEEP kal tlangin vote thlak tura inzirtirna leh infuih phurna nasa taka kalpui a nih thu sawiin, EVM hman dan, vote thlak dan leh vote thlak tura insawmna video clip leh digital flyer eng emaw zat siam a ni a; College leh School-a Electoral Literacy Club te nen thawk hovin, awareness campaign, quiz, slogan writing leh extempore speech te buatsaih a ni a; vote thlak tura inzirtirna sticker chu ei rawngbawlna gas burah leh lirtheiah te bel niin, khawlaiah banner tar leh wall painting te nen theih tawpin ṭan lak a ni, a ti a. Model polling station atan intlar ngai lova vote thlak theihna (queueless) polling station ruahman niin, ngaw leh nungcha lam hawia cheibawl unique polling station ruahman a ni bawk a; Kolasib District chhunga polling station 89 zingah, hmeichhe hlang duty-na tur pink polling station pawh 10 lai ruahman a ni, a ti bawk.

Kolasib DEO chuan voter zawng zawngte'n vote thlak theihna remchang an neih theih nan theih tawp an chhuah tih sawiin, kum 80 chung lam leh vohbik, vote thlak tura polling station pan harsatte chu mobile polling team-te'n in lamah kal chilha postal ballot hmanga vote an thlaktir bakah, election duty turte'n postal ballot-in vote an thlak bawk tih a sawi a. Polling station-ah eng, tui thianghlim, inthiarna leh mamawh zualpui daha chei ṭhat vek a nih thu leh wheelchair hman ngaite tan awlsam taka innawr kaina tur ramp ruahman a nih thu a sawi bawk.

Kolasib DEO chuan inthlan inpuahchahnaa official, tlawmngai pawl hrang hrang, media, mimal leh political party-te'n ṭha taka an thawhpuinaah lawm thu sawiin, inthlan hlawhtling tak neih a nih theih nan thawh hopui chhunzawm zel turin a sawm a. Kolasib District mipuite chu November ni 7, 2023 (Thawhlehni) zing dar 7 leh tlai dar 4 inkar chhunga inthlan buatsaih turah mahni awmna polling station-ah mipui ai awh ram hruaitu thlang tura vote thlak ṭheuh turin a sawmin, a ngen a ni.