2654/2023-2024

Aizawl, 04.11.2023: Vawiin chawhnu Khan DC Pi Nazuk Kumar, District Election Officer, Aizawl District chuan DC Conference Hall ah thuthar lakhawmtute kawm in, inthlanpui atana inpuahchahna hnuhnung te a sawipui.

DC chuan MLA inthlanpui chu kum 5 dan a thleng a nih avangin vote nei tawh phawt chuan vote thlak ngei ngei turin mipui a sawm a. Harsatna nei an awm chuan sawi hreh lo turin leh, a bik takin kum upa lam leh PwDs te chu puih an mamawh chuan an harsatna sutkian sak turin an inpeih reng thu a sawi a.

* November ni 3, 2023 khan inthlanna atana hman tur EVM/VVPAT te chu candidate aiawhte hmaah First Level Checking (FLC), Supplementary Randomization leh Commissioning zawh fel a ni.

* Vawiin November ni 4, 2023 hian 3rd Training of Polling Personnel te tan training hnuhnung ber (3rd Training) neih a ni.

* November ni 5, 2023 hian Randomization of Polling Personnel neih tura ruahman a ni.

* Dispatch Centres atan hmun li - AMC Sports Complex, Bawngkawn, Chaltlang Playground, College Veng/Venghlui Field, Tlangnuam Field ruahman niin, November ni 6, 2023 ah Dispatch hi neih a ni ang.

* EVM Strong Room awmna pathum - Govt. Aizawl College, Assembly Basement leh DC Office, Aizawl bulah theuh Receiving Centre siam a ni.

* Ruahmanna hrang hrang atan Vehicle and Transportation Team hranpa siam a ni a. Polling parties leh officials te tan lirthei ruahman a ni a. Polling party te kal dan tur pawh ruahmanna siam vek a ni.

* Home Voting zawhfel a ni tawh a. November ni 2, 2023 thleng khan postal ballot kaltlanga vote tla hi 3075 a ni tawh a. Hmun hrang hrangah Postal Ballot Facilitation Centre hawn niin, security officials, polling officials leh polling parties te tan postal ballot a thlakna tur ruahman a ni a. November ni 4, 2023 thleng Postal Ballot Facilitation Centres te hi hawn a ni.

* Security kaihhnawih ruahmanna pawh peihfel vek tawh niin, police duty tur te pawh tirhchhuah tawh a ni.

* Voter Information Slip pawh ruahman tawh niin, elector tin te hnena pek turin BLO te kutah dah a ni a. Voter Assistance atana IEC material buatsaih ngaite chu BLO te hnenah pek vek tawh niin, anni hian Polling Station ah an lo dah leh ang.

* Assured Minimum Facility (AMF) a awm theih Nan Sector Officer tin te mawhphurhna pek a ni a. AMF hi mipui nawlpui bakah rualbanlo (Persons with Disabilities) ten awlsam leh nuamsa zawka vote an thlak theihna tur atan Election Commission of India in ruahmanna a siam a ni a. Electricity, toilet, drinking water, ramp, furniture, approach road, mobile connectivity leh telephone (landline) leh a dangte a huam a ni.

* Polling Station zawng zawngah Webcasting tih a ni a. A enkawltu tur Nodal Officer ruat niin, ani hian Webcasting bakah AMF a enkawl ang.

* Vote thlak zawh fel hun bituk atanga chhiar leta darkar 48 chhung hi Silence Period niin, November ni 5 (Sunday) tlai dar 4:00 pm atanga November ni 7 Vote thlak zawh thleng a awh ang. Hemi hnu lamah hian Candidate leh politician te bakah mimal tute mahin campaign phal a ni tawh lova. Electronic media ah te political advertisement tihchhuah theih a ni tawh lo a. Voter te rilru sukthlek kaihhruai thei thil reng reng, interview a ni emaw, debate a ni emaw, sawihona a ni emaw, opinion poll eng chi mah tih chhuah phal a ni lo.

* He darkar 48 chhung hian inthlan kaihnawih thila vantlang inkhawm khap niin, chutiang thil a awm a nih chuan CrPC Sec 144 behchhana an chungthu ngaihtuah theih a ni.