2653/2023-2024

Champhai the 4^th November, 2023 - Vawiin chawhnu khan Champhai District Election Officer Pu James Lalrinchhana 24-Champhai South Assembly Constituency Returning Officer ni bawk kaihhruaiin DC Conference Hall, Keifangtlangah Mizoram Legislative Assembly Inthlanpui, 2023 buatsaih tura Champhai District chhunga inpuahchahna kalpui tawh chin leh hmabak la awmte a sawipui.

Vawiin Press Meet ah hian 23 Champhai North Returning Officer Pu M. Misael, 25 East Tuipui Returning Officer Pu Lalrinawma, Election Officer Pu Benjamin Zalawma Ralte leh election kaihhnawih officials te telin Champhai District MJA Vice President Pu Lalhlupuia leh member dangte an tel a.

Champhai DC&DEO Pu James Lalrinchhana chuan ECI ina Media mite tana Polling Station luh phalna a tih chhuah Authority Letter for Mediapersons (Champhai District) chu Champhai District MJA Vice President Pu Lalhlupuia hnenah a hlan nghal a ni.

Vote thlak ni atana ruahmanna: November ni 7, 2023, Thawhlehni hian vote thlak tan a lo ni dawn ta a. Vote thlak hun chhung hi zing dar 7 atanga tlai dar 4 thleng a ni ang. Polling Station zawng zawng ah hian ECI ina Polling Station tina awm ngei tura a bituk te - electric supply, tui in tur thianghlim, inthiarna, pianphunga rualbanlote hman tur ramp, leh furniture mamawhte Assured Minimum Facility te chu ruahman fel vek a ni a. Voter Information Slip te chu District pumah BLO-te kaltlangin sem mek zel a ni.

Polling Parties te chhuah dan tur: Champhai District a Polling Station 84 awm te chu P-1 vek niin, Polling Parties te hi November ni 6 ah vek DC Office, Keifangtlang atangin an chhuak dawn a. Polling party-te phur tur hian Bus paruk (6) leh MaxiCab 71 te ruahman a ni a. Polling party te hi zing dar 9:30 atanga Despatch Centre atanga chhuak hman thei tura beisei niin, Polling station hla a duty tur te an chhuak hmasa anga, khaw chhunga duty tur te chawhnu lamah an chhuak ang.

Home Voting leh Postal Ballot: Champhai District-ah kum 80 chung lam leh pianphunga rualbanlo (PwD) te Home Voting chu October ni 30 atang khan neih niin mi 90 hming thehlut atangin mi 87 Vote an thlak a, an zinga pakhat hi PwD niin a dang zawng hi Senior Citizen an ni. Polling Officials, Drivers, Absentee Voters Essential Services, District danga vote nei election duty atana ruatte pawhin Postal Ballot kaltlanga vote thlak chhunzawm zelin nimin thlang khan mi 618 in Vote thlak tawhin vawiin leh Thawhtanni ah Vote an thlak chhunzawm dawn a ni.

Law and Order: Champhai District a inthlan venhimna kaihhnawih hna thawk turin CAPF Company pali leh Mizoram Police 300 chuang an duty mek a. Heng Police leh CAPF te hian Champhai District hmun hrang hrangah patrolling kalpui mekin, Flying Squad leh Static Surveillance Team te nen an duty ho bawk a, Strong Room an venghim mek bawk a ni. Security kaihhnawihah Champhai District chu Zone 5-ah then niin, heng Zone te hi anmahni bial tu theuh Police Zonal Officer ten uluk takin an vil a. Engtik lai pawha a tul a che chhuak nghal thei Quick Response Team engemawzat din an nih bakah Champhai, Hnahlan, Zokhawthar, Dungtlang leh Fakrawn ah te Police Check Post (Nakas) engtiklai pawha kalpui a ni a. Inthlanna felfai leh thianghlim, ralmuang taka mipui ten an aiawh tur an thlan theihna turin venhimna lama inruahman lawkna engkim peihfel vek a ni tawh a ni.

EVM Commissioning: Champhai District chhunga Assembly Constituency pathum a hman tur Electronic Voting Machine (EVM) leh Voter-Verified Paper Audit Trail (VVPAT) commissioning chu October ni 27 khan neih a ni a. Champhai District chhunga Assembly Constituency pathumah hian belhkhawmin Polling Station 84 a awm a. Heng Polling Station a thawn tur EVM leh VVPAT te hi a siamtu company Electronics Corporation of India Limited (ECIL) atanga Engineer lo kal ten a that leh that loh an endik a. Candidate symbol te bel niin Polling Day a hman theih turin buatsaih fel a ni. Vote thlak nia hman tur EVM leh VVPAT te hi hman mai theih tura endik fel niin a hmantlak ngei a ni tih finfiah hnuah Strong Room ah dahluh leh vek a ni.

Poll Day-a PwD leh Senior Citizen Te Tana Ruahmanna: Kum (18) tling tawh rualbanlo (Persons with Disabilities) te, taksa lama chavak lo (Infirm voters) tan te leh kum lama upa (Senior Citizen) kum 80 ten Inthlan Ni a harsatna an tawh loh nan leh tluang taka vote an thlak theih nan a hnuaia mi ang hian ruahmanna siam a ni.

An chenna atanga an vote thlakna tur Polling Station-a an kal lam leh haw lam lirtheia hruai zel an ni ang.

· Anmahni hruai nan hian an vote thlakna hmuna duty Polling Party-te lirthei (Official Vehicle) hman tur a ni ang.

· Lirtheiah hian BLO emaw MPF aiawh emaw te chauhin an tawiawm zel tur a ni.

· Political Party mi leh sa tumahin an hruai ve tur a ni lo. An hruai tih hriat a nih chuan an chungah dan anga hmalak a ni ang.

· Taksa lama chakvak lo emaw mahnia kal harsat emaw te tan Vote thlak Ni hian hruaitu/tawiawmtu neih phalsak an ni. Anmahni tawiawmtu te chu India khua leh tui dik tak, kum tling tawh an ni ngei tur a ni.

Webcasting: ECI ina ruahmanna thar a siam angina Polling Station thlanchhuah ah te Live a video kaltlanga lo thlir theihna Webvasting neih a ni dawn a. Champhai District-a Polling Station 50 ah te Webcasting hi neih a ni dawn a. He Webcasting buaipui tura ruat te tan hian November ni 2 ah khan Training neih niin, nimin khan a tih chin na, Dry Run chu hlawhtling taka zawhfel a ni.

Communication Plan for Poll Day – Inthlan Ni ah Presiding Officer ten darkar hnih tinah Report an rawn pek zung zung theihnan leh harsatna awm te an report vat theihnan Communication Plan mumal tak ruahman niin, Pu Lalrinawma Khiangte, SDO (S) chu Overall In Charge ah ruat a ni a. Control Room leh District Contact Centre a duty tur staff thahnem tak ruat niin an hmanraw mamawh te pawh ruahman fel tawh a ni.

Silence Period: Vote thlak zawh fel hun bituk atanga chhiar leta darkar 48 chhung hi silence period niin, November ni 5 (Sunday) tlai dar 4 atanga November ni 7 Vote thlak zawh thleng a ni a. Hemi hnu lamah hian Candidate leh politician te bakah mimal tute mahin campaign phal a ni tawh lova. Electronic media ah te political advertisement tihchhuah theih a ni tawh lo a. Voter te rilru sukthlek kaihhruai thei thil reng reng, interview a ni emaw, debate a ni emaw, sawihona a ni emaw, opinion poll eng chi mah tih chhuah phal a ni lo.

Exit Poll: Sub-section (2), Section 126A of the RP Act 1951 behchhana, Election Commission of India Notification dated 31/10/2023 in a tarlan angin, November thla chhunga state pangaa assembly inthlan lo awm tur atana Exit Poll neih, tihchhuah leh theh darh te khap a ni a. Exit poll neih phal loh hun chhung hi November 7 zing dar 7:00 aṭanga November 30 zan dar 6:30 a ni a. Print leh Electronic Media eng chi pawh a huam vek a ni.

MLA Election, 2023 atan hian Champhai District chu Sector 12 ah then niin 23-Champhai North ah Sector pali (4), 24-Champhai South ah Sector pathum (3) leh 25-East Tuipui ah Sector panga (5) a awm a. Heng sector-ah te hian Sector Officer leh Sector Police Officer pakhat ve ve duty in, Anmahni sector chan theuhah inthlan tluang leh felfai taka kalpui anih theihnan ruahmanna mumal tak – Sector Management Plan an siam fel tawh a ni.

Champhai District Final Electoral Roll, 2023 in a tarlan danin Champhai District ah Voter mi 57,180 an awm a, an zinga mi 27,880 te hi mipa niin, hmeichhe voter 29,300 an awm a. Polling Station hi a zavaiin 84 awmin, 23-Champhai North ah 30, 24-Champhai South ah 25 leh 25-East Tuipui ah 29 a awm a ni.