202/2023-2024

Kolasib dated 25th April 2023: Vawiin chawhma khan Regional Sports Training Centre, Saidan, Kolasibah Mizoram State Sports Council/ Tata Trust District Level Pradhan Mantri Jan Vikas Karyakram (PMJVK) Football Tournament chu Pu John LT Sanga, Deputy Commissioner-in a hawng a. Pu Vanlalfela, Honorary Vice President, Kolasib District Football Association chuan hun kaihruaiin Pu Lalliansanga, Honorary Secretary-in report a pe bawk a ni.

Deputy Commissioner Pu John LT Sanga chuan thalaite tan a infiamna hmunhma changtlung tak Kolasib a awmte chu infiamna kawnga hmasawnna nasa zawk thlentu a nih theih nan hmang tangkai turin kalkhawmte a chah a. PMJVK Football Tournament chu Kolasib thalai infiammite tan inelna sang zawk a invawrh chhohna kailawm pawimawh tak a hmang turin a fuih bawk a ni. Infiammi hlawhtling ni tur chuan mahni inthunun theihna, thu awihna leh tum ruhna neih a pawimawh thu sawiin ruihhlo, zuk leh hmuam lak a fihlim turin kalkhawmte a chah bawk a ni.

Kolasib District Level PMJVK Football Tournament-ah hian Football Acedamy 6 atangin Team an tel a, chungte chu Kolasib, Kawnpui, Bairabi, Vairengte, Bilkhawthlir leh Thingdawl te an ni a. He tournament a chak ber team-te hian Kolasib district aiawhin Inter-District-ah an tel chho leh dawn a ni.