201/2023-2024

Vawiin khan MZP Conference Hall-ah MZP General Headquarters, Aizawl chuan World Book Day pualin hun a buatsaih a. Information and Public Relations Minister Pu Lalruatkima chu khuallian niin he hun hi hman pui.

Khuallian Pu Lalruatkima chuan World Book Day hi World Book and Copyright Day emaw International Day of The Book ti a sawi a ni bawk a, UNESCO in kum 1995 atangin April ni 23 hi World Book Day atan a lo buatsaih a ni a ti a. Mizoram-ah MZP hmalakna in Kum 2022 khan he ni pualin hun hman tan a ni a ti a, kum in hi Pathian ni a nih avangin a ni ah hun a hman theihloh thu sawiin remchan zawkna avangin vawiin a hun hman a nih thu a sawi a ni. Minister chuan hnam fing leh mifing apiangin lehkhabu hlut zia an hria a, thiamna thehdarh nan lehkhabu hi a pawimawh a ni tih an hre zual zel thin a ti a. Mizo tawng humhim leh tih hmasawn mai piah lamah Zo hnahthlak hnam hrang hrang tawng tih hmasawnnan lehkhabu chu hmanraw pawimawh tak a nih thu a sawi a. Tun kum 2023 a World Book Day thupui hi 'Indeginous Language' tih a ni a, a entir chu tualchhuak tawng humhalh leh tih hmasawn a ni a ti a. Khawvelah hian tawng tam tak a ral a, a hmangtu an tlem vang te in emaw a hmangtu te thuziak-ah an chak tawkloh vang a ni thei bawk a ni a ti a. Chutiang chu vawiina thil thleng leh thil thleng reng thei a nih avangin keini zofate pawh hian kan tawng kan vawnhim leh tih hmasawnnan lehkhabu tam zawk ziak zelin, lehkhabu chhiar uar zel ila tiin kal khawmte a sawm a.

Khuallian Pu Lalruatkima chuan lehkha chhiar hnem chuan hriatna a neih belh a, lehkhabu chhiar tu leh a lei tu tam ila, ziaktu te pawn ziak uar zel se, chu chuan nasa takin tawng humhalhnaah kawngro nasa takin a su ang a ti a. Hnam fing chuan an hnam humhalh thin a, tawng thehdarh nan lekhkhabu pawimawhna an hre bawk a ni a ti a. Thuziak tha leh lehkhabu tha chuan hnam inpumkhatna leh thawhhona tha thlen thin a ni a ti a. MZP in Mizo Literature tih hmasawnnana hma lakna hrang hrang te hnam tan a hlu a, MAL kutchhuak lehkhabu te, nitin chanchinbu leh newspaper chhuak te chhiar uar zel ila. Kan tawng aia hnamdang tawng kan hman nasat zawk chuan kan hnam a boral ngei ang a, vawiina thahnem ngai taka ziaktuten lehkhabu an ziah te hi hlut thar ila, ziaktu kan nih theihloh pawn chhiartu nih tum ila, tawng a ral chuan hnam a ral thin tih hria a, Mizo Tawng ziahdan dika ziah uar zelin leh thuril leh thubelh chian dawl leh thudik awmna chu lehkhabu tha a ni tih hre thar lehin, Zoram hi zohnahthlak te chenna tur, ram chhen fak awm a nih zel nan lehkhabu chhiar uar kawngah tan ila thar ang u tiin World Book Day puala hun hmang zawng zawngte sawmin duhsakna a hlan a ni.

World Book Day pual a hun buatsaihah hian MAL Book of The Year, 2022 dawngtu Dr. Zohmangaihi chu lawmpuina hlan a ni a. Ziaktu, Pu C.Lalnunchanga biangbiakna hun hman a ni bawk a. He hunhi zirlai tha hnem takin an chhim bawk a ni.

MZP hian Mizo tawnga ziak Chanchinbu kum 1938 khan a lo chhuah tawh a. Heng chanchinbu ah hian YMA pawhin column neiin thu leh hla lamah nasa takin hnu hma a lo nei tawh a ni.