200/2023-2024

Aizawl, 24th April 2023: India hmarchhak a Survey of Villages Abadi and Mapping with Improvised Technology in Village Areas (SVAMITVA) Scheme hnuaia Property Card semchhuahna hmasa ber chu vawiin khan Phulpui leh Tachhipah te neih a ni a. He hun hi Land Revenue & Settlement Minister Pu Lalruatkima chuan khuallian niin a hmanpui a, Horticulture Development Board Vice Chairman, Aizawl South - III bialtu MLA Prof. F. Lalnunmawia chuan khualzahawm niin a hmanpui bawk.

Phulpui Vantlang Hall-a inkhawm tawi buatsaihah khuallian Pu Lalruatkima chuan thusawiin Property Card semchhuah chu hmasawnna ropui tak a ni, a ti a. Property Card chu LSC nen a danglam loh thu sawiin, dan anga ram neitu nihna mipuite hnenah a pek thu te, Property Card hmangin mipui ten awlsam zawka loan an lak theih tur thu leh zangnadawmna lak kawngah pawh VC Pass-in a huam ve loh ram hlutna ( land value) chhut tel a nih tawh tur thu te a sawi a. Land Revenue Department chu mipuite tana ding a ni tiin, department hmalak na hrang hrang te Minister chuan a tarlang a. National Generic Document Registration System kalpui mekah Sub- Registrars’ Office (SRO) pawh district tinah neih thuai a beisei thu leh awlsam zawka mipui ten chhiah an pek theihna tur ‘Computerise online payment of taxes’ chu peihfel thuai a nih tur thu a sawi bawk.

He hunah hian khualzahawm, Aizawl South III bialtu MLA Prof. F. Lalnunmawia pawhin thusawiin Phulpui khawtlanga sawrkar project pawimawh tak semna leh tlangzarhna hun hman a ni thei lawmawm a tih thu sawiin, he scheme hlawhtlinna atana thawktu te hnenah lawmthu a sawi bawk a. Khawtlang hmasawnna atan mipuite chu sawrkarin a tanpui zel dawn a ni, a ti bawk.

SVAMITVA Scheme hi sawrkar laipui Ministry of Panchayati Raj hnuaia Central Sector Scheme a ni a. He scheme hnuaiah hian drone hmangin thingtlang khuaa mihring chenna hmunte thlalak a ni a, thlalak hmang hian Property Card siam sak theuh an ni. Property Card kaltlang hian mipuite chu dan anga ram neitu nihna pek an ni a, hei hian ramri chungchanga buaina a tihtlem bakah khaw hmunhma ruahman (town & village planning) leh loan lak kawngah te awlsamna a thlen beisei a ni. Sawrkar laipuia Ministry of Panchayat, state sawrkar Land Revenue & Settlement Department leh Survey of India te thawhhona hnuaiah he scheme hi kalpui a ni a.

Tun dinhmunah Mizoram khua 319-ah he scheme hi kalpui tura ruahman a ni a, khua 171-ah te drone hmanga thlalak tan a ni tawh a. Hmarchhak state zingah Phulpui leh Tachhip te hi Property Card semchhuahna hmasa ber niin, vawiinah hian Property Card 420, Phulpuiah card 166 leh Tachhipah card 254 semchhuah a ni.

Property Card semna inkhawm hi Land Revenue & Settlement Director Pu K. Laldingliana chuan a kaihruai a, Pu Remlalliana Hnamte, Deputy Director, LR&S hnen atangin SVAMITVA scheme inhrilhfiahna ngaihthlak a ni bawk.