199/2023-2024

Ṭau thla ni 24, 2023: Vawiin khan Lawngtlai District Disaster Management Authority (DDMA) chu an Chairman, Lawngtlai Bawrhsap Pu David Lalthantluanga hovin Lawngtlai DC Conference Hall-ah an ṭhu khawm.

Lawngtlai DDMA Chairman Pu David Lalthantluanga chuan furpui lo thleng turah khuarel chhiatna hrang hrang thleng thei laka lo inralrin leh chhiatna a thlen thulha hma lak dan tur ruahmanna fel tak neih a ṭul a ni, a ti a. Member kal khawmte chu chhiatna hrang hrang thleng thei laka Lawngtlai District a himna tura ngaihtuahna seng turin a chah a ni.

He hunah hian khuarel chhiatna hrang hrang thleng thei laka inralrinna chungchanga sawrkar office-te mawhphurhna sawi ho niin, office tinin Disaster Management Plan neih a ṭul thu leh office leh a chhehvel himna tura ruahmanna siam a ṭul thu tar lan a ni a. Fur laia kawng chhiat vanga ration buhfaiah harsatna a awm loh nan kudam hrang hrangah monsoon stock an dah mek thu DCSO hnen aṭangin ngaihthlak a ni a. Electric ban him lo leh thingzar thlak ngai a awm chuan khua/veng tina VC te'n DC-ah report-in, P&E lamin a ṭul angin lo bawhzui ṭhin se, tih a ni. Incident commander leh village level disaster management committee te'n an huam chhunga chhiatna thlen hlauhthawnawmna laite chhinchhiahin, a ṭul anga hma lak ni se tih niin, khuarel chhiatna a thlen thulha himna tur leh biak pawh tur mipuiin an hriat theih nan DDMA aṭangin a remchang laiah public notice tar ni se, tih a ni a. He'ng bakah hian hma lakna tur hrang hrang ruahman a ni bawk.