Vawiin chawhma dar 11.00 khan Kolasib DC, Pu Jitender Yadav IAS chuan Rengtekawn-a Food Corporation of India (FCI) kudam chu a tlawh a. Kudam luhna gate kianga lungphun pahnih sawnna tur a enfiah a; DC hi chanchinbumite leh Gosen Veng YMA Branch hruaituten an tawiawm a ni. FCI Kudam luhna gate sirah hian Rengtekawnpui tia hriat thin, kum 2007 atanga Gosen Veng tia a hming thlakna lungphun leh Gosen Veng YMA Platinum Jubilee hriatrengna lungphun te a awm a; hei vang hian gate hi zauh theih a ni lo va, buhfai phur truck lian te tan luh leh chhuah a harsat phah thin a ni. DC hova YMA hruaitute leh FCI hotute nena sawiho a nih hnuin, lungphunte hi kawngpui kam hmun awl remchangah sawn remtih a ni a, a sawn hna hi Gosen Veng YMA Branch ten an thawk ang a, an sum senso chu FCI lamin an tum dawn a ni.

Kolasib DC chuan buhfai leh wheat dinhmun te a enfiah nghal a. Rengtekawn-a FCI Kudam-ah hian metric tonne 5000 chhekkhawl theih a ni a, vawiin, ni 22.8.2014-a DC-in a tlawh lai hian buhfai metric tonne 4099 (40996.97 quintals) leh wheat metric tonne 680 (6789.80 quintals) chhekkhawl a ni a; FCI lam chuan truck lian 20 phur vel bak tun dinhmunah dahna tur an neih tawh loh thu an sawi a ni.