Vawiin khan Lawngtlai DC Conference Hall ah 37- Lawngtlai West Constituency huam chhunga Boot Level Officer ten Special Summary Revision of Electoral Roll 2015 atana inbuatsaihna Pre-Revision Training an nei.

Lawngtlai District Addl. DEO Pu R. Lalsangluaia’n he training hi kaihhruaiin Boot Level Officer lo kal khawm te chu ram tana an pawimawhzia hrilhhriatna a nei hmasa a. Democracy ramah hian thil pawimawh tak pathum an awm a, pakhatna chu ram zalenna leh a humhim hna (Defense) niin tuma awp beh loh ram nih hi a ni a, a pahnihna chu mipuiten ram hruaitu atana an duh te ngei in ram an hruai theih nana inthlanna dik leh thianghlim neih a ni leh a, a pathumna chu ram mipuite hnathawh leh kan nunkhua theuh te hi an ni. BLO te hi Democracy tundin nana lungphum pahnihna inthlanna thianghlim a awm theih nana thawktu, a bulhrum tak tak khawih tute in nih avangin in hna hian kan ram hmakhua a hril a ni tiin a fuih. Hemi hnu hian District Election Office atanga thlanchhuah Officer leh Lawngtlai BDO ten Roll Revision atana BLO hna hrang hrang te chipchiar takin an zirtir a ni.