316/2025-2026

Dated Kolasib the 24th April, 2025 : Vawin khan Kolasib DC Conference Hall-ah Mizo National Youth Front (MNYF) General Headquarters hruaitute leh Kolasib District- a MNF thalaite chuan Thingdawl Polytechnic-a kuhva ro Kolasib District Magistrate-in a tihral chungchang bawhzuiin, a hmunah kalin an rawn en fiah a. Hetah hian Pu H. Lalramliana, SDO(S), Kolasib leh Pu David H. Lalthangliana, Sr. SP Kolasib-ten lo dawngsawngin, hun eng emaw chen inbiakna neih a nih hnuah MNYF hruaituten an duh angin Polytechnic Building-a kuhva dah khawm mekte pawh kawngkhar hawngin an en fiah a ni.

Hemi hnu hian Kolasib DC Conference Hal-ah Pu Robert C. Lalhmangaiha, Deputy Commissioner, Kolasib hovin meeting neih leh a ni a. Hetah hian MNYF hruaitute chuan kuhva tihral chungchanga zawhna an neihte zawtin, Kolasib Bawrhsap chuan a hmalak dan a chin chhuakin a hrilh a. Kuhva ro chu DC-in khapna thuchhuah, (Prohibitory Order) a tihchhuah hmanga man a nih dan te, District Court-in District Magistrate hnenah kuhva man sate tihral (dispose) tura thuneihna a pek anga tihral a nih thu leh, tihralna tura kalphung tha bera a hriat angin District Magistrate-in hma a lak dan te sawi fiah a ni a. Hei bakah hian Vairengte Kudam (Godown) atanga kuhva rah bag bo chungchanga hmalak a nih dan leh thil awmdan, Deputy Magistrate Prohibitory Order tihchhuah hma avanga hma lak chhunzawm a nih loh dante pawh Kolasib SP Pu David H. Lalthangliana chuan a sawi fiah a ni.

Hemi hnu hian MNYF hruaituten an dil angin Thingdawl Polytechnic-a kuhva ro chungchanga court thurel te, District Magistrate-in tiral tura hma a lak dan leh auction a nihnaa lehkha pawimawhte chu Pu Robert C. Lalhmangaiha, Deputy Commissioner/District Magistrate chuan MNYF hruaitute hnenah hian a hlan a.

Hei hi tun hnaia Pu Robert Romawia Royte, MLA-in Kolasib DC hnenah zawhna a siam chhanna a ni nghal bawk a ni.