317/2025-2026
Lunglei, 2025 Ṭau thla ni 24: Vawiin khan Lunglei District Cooperative Development Committee (DCDC) chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm a. Hma lakna hrang hrang thlir hovin, hma lakna tur hmachhawp eng emaw zat an ruahman.
Vawiina District Cooperative Development Committee ṭhu khawm hian Lungleia Primary Agricultural Credit Society (PACS) awmho zinga khawl nena la thlun zawm loh (computerised loh)-te chu computerised tura hma lak ni se, an ti a. Lunglei District-a PACS paruk zinga pahnih - Electric Veng Multipurpose Co-operative Society leh Cherhlun Agri Farming Co-operative Society te chu computerised a nih tawh thu tar lan niin, PACS dang pali te pawh computerised tura hma lak ni se, tih an rel a ni.
Ṭhut khawmah hian Ministry of Cooperation-in thla tin M-PACS Dairy leh Fishery panga tal ziak lut (register) tura a tih angin, Nghasih zau, Sethlun leh Zotlang M-PACS te register a nih thu tar lan a ni a. He'ng bakah hian M-PACS dangte pawh register tura hma lak mek a nih thu tar lan niin, India sawrkara Ministry of Cooperation duh danin, M-PACS tinin By-Law inang tlang an hman tur pawh Mizo ṭawnga dahin, peih fel ṭep a nih thu tar lan a ni bawk.
He ṭhut khawmah hian PM-BJP (Pradhan Mantri Bharatiya Janaushadhi Pariyojana) scheme hnuaia M-PACS te'n damdawi man tlawm (Generic Drugs) zawrh phalna an dil theih chu Lunglei aṭangin M-PACS 5-in an dil thu te, Leitlangpui M-PACS te chuan License an hmuh tawh thu leh Lunglei Bazarvengah dawr an kalpui mek thu tar lan a ni a. Lungleia M-PACS paruk te chu Fair Price Shop hawng tura thlan an nih thu leh M-PACS dang pahnih te chu Food Processing Industry lam ti tura thlan an nih thu te, Ministry of Cooperation duh dana Registered Society-te data portal-a upload vek tura hma lak a nih thu leh September thlaah International Year of Cooperation lawmna hun buatsaih tura ruahmanna siam a nih thu te tar lan a ni bawk.
