318/2025-2026

Champhai, 24th April, 2025: Champhai District Bawrhsap Pu Mohammad Aaquib chuan vawiin khan Selam, Lungphunlian Tualcheng leh Vapar khuate tlawhin VC leh NGO te kawmna hun a hmang a, Zirna in, khawtlang leh sawrkar hmunhma pawimawhte tlawhin thawktute kawmin mamawh leh tul dangte a sawipui bawk.

Champhai District Bawrhsap chuan khawtlang hruaituten sawrkar hmunhma cheibawl leh enkawl kawnga neitu thinlung an pu thin chu fakawm tiin, thawhhona tha tak vawngnung zel turin a chah a. Khawtlang hruaituten an mamawh an thlen chungchangah kawng awm thei ang te a lo dap pui tur thu a sawi a. Zirna tih hmasawn a ngaipawimawh thu sawiin zirna tih hmasawn nan zirtirtu, nu leh pa te tanrual a tul thu sawiin zirtirtute chu intuaithar thin tur leh nakin lawka ram leh hnam innghahna tur enkawltu an ni tih hriaa zirlai naupang te rilruah rualelna dik tuh tum tur te, an mamawh khawp thiamna leh midangte el pha thei tur zirtirna pek tum turtein a chah a. Ruihhlo leh a kaihhnawih laka zirlaite an fihlim theih nan an nungchang chik thin turtein a chah bawk.

Pu Mohammad Aaquib chuan khawtlang hruaitute chu sawrkar thupek leh hriattirna chhuahte tha taka kengkawh tur leh mipuite zirtir kawnga tan la turin a chah a. Dan lova thil tih ven leh man chhuah kawngah theihtawp chhuaha sawrkar tawiawm tlat turin a sawm bawk a ni.

District Bawrhsap hian he hunah hian Anganwadi Centre leh Zirna in hrang hrangte tlawhin inenkawl dan, ei leh in dawn thin te, PM Poshan, Nutrition Garden, SMC/SMDC chungchanga hmalaknate a enfiah bakah zirtirtu leh zirlaite kawmin fuihna thu a sawi bawk a ni.

Champhai District Bawrhsap chuan District huam chhunga khaw hrang hrang Village Council leh NGO hruaituite kawma a tahtawl a tlawh zel a tum thu a sawi bawk.

Bawrhsap hi District Local Administration Officer, Pu Benjamin Zalawma Ralte leh khawtlang hruaitu ten an ṭawiawm a ni.