319/2025-2026

Lunglei, 2025 Ṭau thla ni 24: Vawiin khan Mizoram State Project Monitoring Commitee (MSPMC) chuan an Secretary, Er Lalthanzuala Ralte kaihhruaiin Pradhan Mantri Gram Sadak Yojana (PMGSY) Phase-III hnuaia Lunglei-Kawlhawk-Buarpui kawng kilometre 66.500-a thui siam ṭhat hna thawh mek chu a hmunah kal chilhin an enfiah.

MSPMC Inspection Team-ah hian Secretary Er Lalthanzuala Ralte bakah, Er Valbuanga (Member), Er H. Laldintluanga (Member), Dr Laldinpuia (Member), Prof. Chawngsailova (Member), Pu Vannunmawia (PS to Vice Chairman) leh ⁠Pi Vanchhungi (Task Force, MSPMC) te an tel a. He Project an tlawhnaah hian hna enkawltu Public Works Department (PWD) official-te leh hna thawktu contractor-te'n lo dawngsawngin, an hriat duh ṭul leh pawimawhte an lo hrilhfiah a ni.

Lunglei-Kawlhawk-Buarpui kawng siam ṭhat hna hi Inckah Infrastructure Technologies Pvt. Ltd, New Delhi te'n thawkin, FDR & Cold Mix Technology hman a ni a. Agreement Amount hi cheng nuai 5,834 niin, September ni 8, 2024 khan thawh ṭan a ni a. March ni 8, 2026 (thla 18 chhung)-a thawh zawh tura ruahman a ni.

MSPMC Inspection Team hian kawng siam hna thawh mek hi a ṭhat leh ṭhat loh enfiahin, kawng siam nana hmanraw hmante a ṭhat tawk leh ṭhat tawk loh endikna hmun, New Khawleka Inckah Infrastructure Pvt. Ltd Field Laboratory chu tlawhin an endik bawk a. PWD official-te leh hna thawktu contractor te nen ṭha zawk, tlo zawk leh chak zawka hna thawh a nih theih nana rawtna an neihte leh bawhzui ngai hrang hrangte an sawi ho a ni.