1293/2026-2027

Kolasib, 4th July, 2026: Tukin khan Kolasib Diakkawn Bazar thar sak hna bul tanna hun hman a ni a. Mizoram Legislative Assembly Deputy Speaker leh bialtu MLA ni bawk, Pu Lalfamkima chuan bazar thar sakna atana bazar hlui thiah hna bul tanna chu a hawng a. He hun hi Kolasib Additional Deputy Commissioner (Addl. DC) Pi B. Malsawmtluangi chuan a kaihruai a ni.

Khuallian Pu Lalfamkima chuan thu sawiin, bazar chu sumdawnna leh hmasawnna hmun pawimawh tak a nih thu a sawi a. Mi tam tak eizawnna hmun a nih avangin sawrkar pawhin a ngai pawimawh hle a ni, a ti. "Sawrkarna kan chan tirh atanga ngaihtuahna kan lo sen, a taka bazar thar sak that tura sawrkar hotuten an remti hi a lawmawm hle a ni," a ti a. Bazar thar sak chhungin bazara thuten harsatna an tawh loh nan ruahmanna siam a nih thu sawiin, dawhthei tak leh pangchang mai lova, bazar thar sak chhung chu chhel taka sawrkar hmalakna tawiawm turin mipuite a chah a ni. Kolasib pa ngeiin bazar sak hna a thawk dawn chu lawmawm a tih thu sawiin, tha taka sak puitling ngei a nih a beisei thu a sawi. Kolasib Venglai Bazar pawh sak that tura ruahmanna chak taka kalpui mek a nih thu a tarlang bawk.

Deputy Speaker chuan thu sawi zelin, hmasawnna hna thawh a nihin mipuiten harsatna an tawh chang a awm fo thin thu a sawi a. Kolasib khawpuiin tui hnianghnar zawka a dawn theih nan, tui pipe kum 30 dawn an lo hman tawh chu thlakin, a aia lian zawk pipe thar phum hna zawh a ni tawh a, pipe phumna tura kawngpui tichhiatte pawh siam that hna thawh thuai a nih tur thu a tarlang. Project Veng atanga Dumlui panna Agriculture Link Road PCC flooring tura ruahmanna awm pawh laih zau hna bul tan a nih tawh thu sawiin, he kawng pawimawh tak hian Bairabi kalna tur chu kilometre 14 zetin a titawi dawn a ni, a ti. Kolasib District chu zirna kawngah a hmasawn a ngaih thu sawiin, district dangte el pha tura tan lak a ngaih thu a sawi a. Ruihhlo laka thalaite an fihlim theih nan mipuite tanrual a pawimawh thu a tarlang bawk.

Pu Lalthangkima, District Commerce & Industries Officer (DCIO), Kolasib hnen atangin technical report ngaihthlak a ni a. Diakkawn Bazar thar tur hi Mizo chhiar danin chhawng li (4) tura ruahman a ni a, thla 12 chhunga sak zawh hman beisei a ni. A sakna tur sum hi SASCI (Special Assistance to States for Capital Investment) 2025-2026 atanga hmuh niin, cheng nuai 470 (Rs. 4.70 Crores) ruahman a ni.

Hawnna inkhawm tawi hman zawh a nih hian Deputy Speaker leh bialtu MLA Pu Lalfamkima chuan bazar thar sak hna bul tanna atan bazar hlui kailawn bang chu a vaw thiat nghal a ni.

Vawiin hun hmanna ah hian veng chhung VC member te leh mi thahnem tak an kalkhawm a ni.