1292/2026-2027

Kolasib, 4th July, 2026: Vawiin khan DC Conference Hall, Kolasib-ah District Election Officer (DEO) leh Kolasib Bawrhsap ni bawk, Pu H. Dolianbuaia kaihhruaiin Kolasib District chhunga Assembly Constituency pathumte atana Draft Electoral Roll tlangzarhna neih a ni a. He hunah hian election official te leh political party hrang hrang aiawhte an tel a ni.

Thutkhawm kaihruaitu DEO chuan thu sawiin, tun tuma Draft Roll tlangzarh hi Special Intensive Revision (SIR) hmanga buatsaih a nih thu a sawi a. SIR chu in tin fangkuala form ruat sa leh voter data hlui endikna hmanga inthlan bu-a hming awmte enfiah leh siam that hna a ni a. A tum ber chu inthlan bu dik tak siam a, mitthi, hmun danga pem nghet, hming inang leh ram mi ni lote paih chhuah a, ram mi dik tak vote thlak theite hmaih loh a tum a ni, a ti. Mizoramah hetiang Special Intensive Revision hi kum 2005 khan neih hnuhnung ber a ni a, kumin 2026 hian neih leh chauh a ni.

He revision atana enumeration form sem chhuah leh lak khawm (data entry) hna hi May ni 30 atanga June ni 28, 2026 chhung khan hlawhtling taka zawh hman vek a nih thu tarlan a ni bawk.

Vawiina (04.07.2026) Draft Electoral Roll tlangzarh taka a lan danin Kolasib district chhungah hian voter 61,340 an awm a, chung zinga 29,335 chu mipa niin, hmeichhia 32,005 an ni.

Assembly Constituency mal dinhmun chu hetiang hi a ni:

 1. 4-Tuirial (ST) AC : Voter 17,719 (Mipa 8,607 leh Hmeichhia 9,112)

 2. 5-Kolasib (ST) AC : Voter 22,952 (Mipa 10,696 leh Hmeichhia 12,256)

 3. 6-Serlui (ST) AC : Voter 20,669 (Mipa 10,032 leh Hmeichhia 10,637)

He Draft Roll a kim lo leh dik lo te siam thatna thehluh theih nan July ni 5 atanga August ni 4, 2026 chhung hi Claims & Objections hun atana hawn leh a ni dawn a. Heng hun chhunga form lutte hi ERO leh AERO ten uluk taka endikin September ni 2, 2026 hmain an tifel  ang a, hemi hnu September ni 6, 2026 khian Final Electoral Roll chu tlangzarh (publish) leh tur a ni ang.