1291/2026-2027

Saitual, the 4th July, 2026: Vawiin khan DC Conference Room, Saitualah Election Commission of India ruahman angin Special Intensive Revision of Electoral Roll, 2026 neih mekah Saitual District hnuaia Assembly Constituency pathum- 8- Chalfilh, 9-Tawi leh 21- Lengteng Draft Electoral Roll chu District Election Officer leh District Bawrhsap ni bawk, Pu Srinivas Sadi chuan a tlangzarh.

He hunah hian District Election Officer Pu Srinivas Sadi chuan thu a sawi a, Draft Electoral Roll tlangzarhna huna lo kal zawng zawngte chungah lawmthu sawiin, ECI ruahmanna angin, Special Intensive Revision (SIR) Phase-I Ieh Phase-II chu state 13-ah neih zawh tawh a ni a, a bâk State/UT dang zawngah, Phase-III kalpui tur niin, tunah hian Mizoram bakah Odisha, Sikkim leh Manipur-ah te SIR hi kalpui mek a ni, a ti.

DEO chuan tuna Draft Electoral Roll tlangzarh thei tur hian nikum atangin nasa takin hmalak chhoh a ni, a ti a,  DC Office-a Election Branch-te, ERO-te, AERO-te leh BLO-te chu an thawkrim hle a ni tih sawiin, Political Party/BLA-te, NGO-te leh Kohhran hrang hrangte puihna zarah, Draft Roll hi tlangzarh a ni thei tur chu lawmawm a tih thu a sawi bawk.

Pu Srinivas Sadi chuan tuna Draft Roll publish hi hna bul tanna tur chauh a la ni dawn tih sawiin, hemi atang hian E-Roll dik leh felfai buatsaih turin E-Roll-a inthun thar (new voters) leh paih (deletion) ngai te, siam that ngai nei leh insawn tur (correction/shifting) te tan dilna hun a ințan dawn chiah a ni tih a sawi. Tun ațang hian hmabâk leh hna thawh tur tam tak a la awm avangin Political Party, NGO- YMA, MHIP, MUP leh Kohhran hruaitute nen thawhhona tha tak an neih chhunzawm zel a beisei thu a sawi a ni.

Election Officer Pi Mary L. Rodinpuii chuan Saitual District-a Special Intensive Revision (SIR) 2026 kalpui a nih dante a sawifiah a, Draft Electoral Roll chungchangah report a pe nghal bawk a ni. Draft Electoral Roll 2026-ah hian voters mipa 26,573 awmin, hmeichhia 27,420 an awm a, a vaiin voters 53,993 an awm a ni. Roll hnuhnung ber nena khaikhinin voters 2327 in Draft Electoral Roll 2026-a voters awm zat hi an tlem zawk a, hei hi chhan hrang hrang- pem te, thi te leh roll-a chuang nawn te an paih vang a ni.

Vawiin Draft E-roll tlangzarhna hun hi District Election Officer Pu Srinivas Sadi chuan a kaihruai a, Election Officer Pi Mary L. Rodinpuii chuan report pein, Draft E-roll semna hun hi a kaihruai nghal a ni. Vawiin hun hmannaah hian Pu Lallawmawma ERO 21- Lengteng, Pu Tharun Patnaik Madala, ERO 9-Tawi, Pu V. Laldinsanga, ERO 8-Chalfilh, Pu Jacob Hlychho, Addl SP, Political party hrang hrang aiawhte, BLO-te leh khawtlang hruaitute an tel a ni.