57/2025-2026

Dated Kolasib the 4th April 2025 : Vawiin khan District Research Officer-in Quarter tina mipuite leh Sawrkar, Researchers leh pawl hrang hrangte tana tangkai tur ‘Kolasib District Quarterly Statistical Bulletin – October to December 2024’ edition a buatsaih chu Pu David A. Lalhmingchhuana, MIS, District Information & Public Relations Officer(DIPRO), Kolasib District-in tlangzarhna hun a hmang.    

Kolasib DIPRO, Pu David A. Lalhmingchhuana chuan Quarterly Statistical Bulletin – October to December 2024 tlangzarh a ni thei chu lawmawm a tih thu a sawi a. District dangin an la kalpui rih loh, Kolasib District dinhmun zirchianna felfai taka Quarter tina buatsaih a ni thin chu ropui a tih thu sawiin khawtlang leh ram hmasawnna hmanraw pawimawh tak a nih chhoh zel tur thu a sawi a. Sawrkar hmalakna kawng hrang hrangah tehfung leh innghahna atan an data lakkhawm te chu a tangkai thu sawiin, data lakhawma report felfai taka buatsaihtu Kolasib District Research Officer leh a thawhpuite hnathawh chu a chhuanawm takzet a ni, a ti.

He hun hi Kolasib District Research Officer Pu Zoremmuana Ralte in kaihruaiin, District Research Office-in Kolasib District-a Research a kalpui dante Report pein an Data lakkhawm dan chungchangah Technical Report a pe bawk.  

Kolasib District Quarterly Statistical Bulletin, October to December 2024 a Report langsar zualte chu:    

(1)    No of Registered Births & Deaths (Naupiang leh mithi awmzat): October 2024 atanga December 2024 chhung hian Kolasib District ah Nau piang 364, mipa 205 leh hmeichhia 159 an awm a. Mithi hi 155, mipa 94 leh hmeichhia 61 an ni bawk a ni.

July-Sept 2024 chhunga Kolasib District a Birth Rate chu 3.59 (per 1,000) a ni a, Death rate chu 1.53 (per 1,000) a ni.    

(2)    Causes of Death in Kolasib District : DRO Office-in a chhinchhiah dan  chuan October - December 2024 chhunga thihna thlen tam chhan ber chu Cancer (20) niin, Liver(thin) failure (19) leh Heart Disease/Attack (17) ten an dawt a ni.

(3)    Meteorological Data : October - December 2024 chhungin Kolasib District-ah chawlhrual a lakin Ruahtui 0.68mm a tla a, Khawlum lamah a sanglai ber 24.98oC niin a vawt lai berin 20.80oC a ni a. Boruak hnawn zawng (Humidity) ah a sanglai ber 96.13% niin a hniam lai berin 92.33% a ni a.

(4)    Inflation rate (thilman sanzawng tehna): Kolasib DRO hmalakna in Mizoram Inflation rate zirchianna neih thin a ni a, khawpui leh thingtlang lam a thilman san dan danglam dan Data lakkhawm thin niin, July – September 2024 a Inflation Rate 2.97% chu October – December 2024 ah 4.09% ah a pung tih tarlan a ni bawk.    

Heng bakah hian Kolasib khaw chhunga hmun hrang hranga pawisa chet dan zirchianna te, mipui nunphung zirchiannate leh Sawrkar Department hmalaknate DRO Quarterly Statistical Bulletin ah hian tarlan tel a ni bawk.

Vawiina ‘Kolasib District Quarterly Statistical Bulletin – October to December 2024’ tlangzarhna ahhian DIPRO hi Mizoram Journalist Association (MJA) Kolasib District-ten an tawiawm  a ni.