56/2025-2026

Lunglei, 2025 Ṭau thla ni 4: Lunglei District Disaster Management Authority (DDMA) Chairman, District Bawrhsap Pi Navneet Mann chuan April ni 3, 2025 khan a hnuaia mi ang hian ṭhal khaw ro leh khaw lum laia fimkhurna tur chungchanga mipuite hnena hriattirna a chhuah.

"Khua a ṭhal chhoin a ro ṭan hle a, kangmei thlen/chhuah awlsam hun kan tawn chhoh mek avangin mipuite kan fimkhur tlan a ngai hle. Kan chhehvel hmun ṭhenkhatah kangmei chhuak te a awm ṭhin a, a pawi hle a ni. Ramngaw leh nungchate kangmei laka an him theih nan leh khaw lum lutuka harsatna kan pumpelh theih nan a hnuaia hriattirna tarlante hi zawm ṭheuh turin kan inngenin, kan inhriattir a ni:

"1. Village Disaster Management Committee-te indin tharin, inralring renga awm tur a ni ang. Kan khaw ram chinah kangmei chhuak a awm em tih thlithlai reng i la, kangmei chhuak a awmin a tikangtu chhui chhuah chu Local Council/Village Council/LDMC/VDMC mawhphurhna a ni a; ram tikangtu hriat a nih veleh police leh forest department-a thawkte hnenah hriattir nghal ni se.

"2. Village Council tinte'n mahni khaw ram chinah ram/in kang a awmin a rang thei ang berin District Emergency Operation Center (DEOC) Toll Free number 1077-ah emaw, bialtu Zonal Officer leh Fire & Emergency Services-ah te hriattir tur a ni.

"3. Eng tik lai pawhin tui bucket khat inah dah ṭhin i la. Kangmei tam tak hi tuia leih hlum nghal mai theih a awm a, dap chawp chuan a tlai thei. Kangmei laka kan him theih nan kan in leh a vel te kan tifaiin, thil kang awlsam bik (petrol, diesel, khawnvartui, lehkhachhia, sarang, etc.) te fimkhur taka vawn a, then fai ṭhin tur a ni.

"4. Mei zu mite'n kan meizial bung te paih mai mai lovin, kan paih hmain tihhlum/tihmih a ni em tih chian ngei tur a ni e.

"5. Kan in luah leh a vela electric wiring fel leh fel loh te en fel fo ṭhin tur a ni a. Kan hmanrua - istiri, heater, adt. hman loh lai chuan off zel tur a ni. Gas cylinder leak hman luih loh tur a ni a, ar vulhtute'n electric wiring ṭha taka fit a, kangmei tichhuak thei laka fimkhur turin mipuite kan inhriattir a ni.

"6. Khaw lum chho zelah taksa hriselna te a inchen loh avangin harsatna tawh palh a awm thei a, chu vangin, khaw lum zuala kan hriat reng tur advisory thil tel a ni bawk."