896/2024-2025

Dated Kolasib the 21st June, 2024: Vawiin khan Kolasib District Information & Public Relations Officer thar Pu David A Lalhmingchhuana chuan a office chamber-ah Mizoram Journalists' Association (MJA), Kolasib District member-te nen inhmelhriat nana thingpui in hona leh inkawm hona hun a buatsaih.

Kolasib DIPRO thar Pu David A Lalhmingchhuana chuan Kolasib District chu District lian tak leh Office leh inkaihhruaina ah pawh changtlung tak a nih angin MJA members pawh an thahnem in inrelbawlna felfai tak an neih a ni tih a lo hriat tawh thu a sawi a, Kolasib alo thlen atanga MJA member ten an lo dawnsawn danah lawmthu a sawi bawk. MJA chu I&PR nen thawkho tlat an nih avangin thawhhona tha tak an neih chhunzawm zel a beisei thu a sawi a, mipuite hnenah chanchin dik leh rintlak thlen kawngah theihtawp chhuah ho turin a sawm bawk.

He inkawmhonaah hian District MJA te hi an President Pu Andrew Vanlalauva'n a ho a. MJA members te inhmelhriattirna a neih zawh in Kolasib District a MJA te hnathawh dan tlangpui te a tarlang nghal a. Pu Andrew Vanlalauvan thusawina a neih zawh hian inkawmhona neih zui niin,  MJA ten chak zawk a hma an lak theih nan  an mamawh te sawiin  Sawrkar office-te'n chanchinbu kal tlanga advertisement an tihchhuah chungchangah sawrkarin chhuah man (rate) a bituk leh chhuah dan tur a siam anga display leh classified-a chhuah tur chi a dik taka kalpui a nih theih nan te leh advertisement te chanchinbu a pek thin chu a theih anga rotation a kal chhunzawm ni se an ti bawk.

DIPRO leh MJA te inkawmhona an neih zawh hian Kolasib District MJA T-shirt tlangzarhna Pu David A Lalhmingchhuana,  DIPRO hian  a nei nghal a ni.

Tun dinhmunah Kolasib District-ah hian MJA member 14 awmin, sawrkarin accreditation a pek prominent press representative 1 leh accredited journalist 13 an awm mek a ni.