895/2024-2025

Aizawl, 21^st June, 2024: Vawiin khan PWD Minister Pu Vanlalhlana’n Mizoram Co-operative Apex Bank Ltd. (MCAB), Durtlang branch a hawng a. Hawnna inkhawm hi M. Suaka Auditorium, Durtlang-ah neih a ni.

Minister Pu Vanlalhlana chuan a bial chhungah MCAB Ltd. in branch thar an hawng chu lawmawm a tih thu sawiin, Durtlang leh a chhehvel mipuite tan malsawmna thlentu a nih ngei a beisei thu a sawi a. MCAB chu Mizoram Bank a nih anga khawtlang mipuiten tangkai taka hmang thin turin sawm a. Mizorama bank hrang hrang awm zingah an pawisa hmuh atanga Mizoram mipuite hnena luangchhuak tha ber chu Mizoram Cooperative Apex Bank a nih thu sawiin, Deposit atanga Loan pekchhuah tehna CD Ratio pawh 78% lai a nih thu a sawi. AMinister hian amah ngei pawhin Apex Bank-ah savings account neiin, a in leh lo din nan pawh Apex Bank a hman tangkai thu sawiin, Durtlang mipuite pawn hmang tangkai ve ngei turin a sawm a ni. Sawrkar nen tha taka thawk tlang zel turin MCAB hi a sawm bawk a ni.

Mizoram Co-operative Apex Bank Ltd. (MCAB) hi July ni 31, 1982 ah din a ni a, bank zawng zawng zinga Mizoram mipui leh sawrkar-in neitu nihna za a za (100%) a neihna Bank awmchhun a ni a, Deposit vaibelchhe 1,508 neiin Loan vaibelchhe 1,172 pek chhuah a ni. MCAB Durtlang Branch hawn tak hi Apex Bank branch 28-na a ni a, ATM dah nghal tura ruahman niin reiloteah hawn theih an inbeisei a. Aizawl khawpui chhungah Branch 13 neiin Aizawl pawnah branch 15 an nei mek a ni. ATM booth 35, mobile van ATM 2 (Lunglei & Mamit) chhiar telin an nei a, kumin chhung hian Branch thar 8 hawn hman an tum bawk a ni. MCAB hnuaiah a ngheta thawk mi 173 an awm mek a, Provisional Employee 30 awmin private security guard 90 an chhawr bawk a ni.

MCAB Durtlang branch hawnna inkhawm hi MCAB Chairman Pu Lalnunsanga'n a kaihruai a, MCAB CEO Pu A. Lallungmuana'n report pe in, MCAB Director Pu Rosiamliana Ralte-i'n lawmthu sawiin hnu a khar a ni.