Vawiin khan District Consultative Committee chuan January - March, 2017 chhunga Kolasib District a Bank hrang hrang awmte hnathawh thlirhona DC Conference Hall, Kolasib-ah an Chairman District Bawrhsap Dr.Arun T hovin an nei. 

Committee-ah hian Dr Arun T chuan Bank te mipuite tana dawr nuam zawk leh pan nahawm zawka awm turin a ngen a. Dinhmun sawhngheh nan leh hmasawnna atana loan lak theih hrang hrang te pechhuak tam tura ngenin, heng loan puk theih hrang hrang te mipuite hriat tura puangzar thin turin a ngen bawk. 

Committee chuan Bank hrang hrang ten loan an pekchhuah dan te, Reserve Bank of India in kaihhruaina a siam zulzuiin hna an thawk em tih te leh Bank kaltlanga sorkar scheme hrang hrang kalpui te an thawk tha tawk em tih an sawiho a. Kolasib District chhungah hian Bank hrang hrang 7 awmin, Bank branch 14 a awm a ni. 

Bank te Credit Deposit Ratio hi a hniam berah 60% tur a nih laiin, Kolasib District a Credit Deposit ratio chu 43.22% a ni a. Hemi kawngah tanlak a tul thu sawiho a ni a. January - March, 2017 chhungin Agricultural loan Rs.783.90 lacs, Micro, Small & Medium Enterprises (MSME)loan Rs.1053.9 lacs,  Housing loan Rs.882.85 lacs leh Education loan Rs.6.35 lacs pekchhuah a ni a. Sorkar kum kallai mek a March, 2017 thleng khan Kisan Credit Card 370, Rs.241.75lacs hu pekchhuah a ni a. Self Help Group 158 din thar niin, khaw 37 ah hmalak a ni a, Bank atang an tana hamthatna awm theite pekchhuah thin a ni. Prime Minister's Employment Generation Programme (PMEGP) Loan mi 24 hnenah Rs.29.88 lacs pek chhuah tawh a ni bawk. 

Bank kalphung leh sum leh pai vawn chungchanga inzirtirna Financial Literacy Campaign Mizoram Rural Bank Kolasib, Bilkhawthlir, Vairengte, Kawnpui leh Lungdai bakah Mizoram Co-operative Apex Bank ten vawi 32 an huaihawt a. Hemi chungchangah hian Committee chuan Bank te thahnemngai turin a hrilh a ni. 

Committee-ah hian Bank hrang hrang te mipui rawngbawltu an nih anga sorkarin mipui te hamthatna tur a duan te chak zawk leh mipui tam zawkin an dawn theih nan huang zauh tur leh hmala tha turin inhrilhhriat a ni.

Attachment

  • Loading attachment...