Vawiin khan Kolasib Bawrhsap pisa pindan ah Kolasib District, Meidum khua a Bru chhungkaw hnih rawn let te hnenah Bawrhsap Dr.Arun T, IAS leh Pu Denny Lalchhuanawma, MCS, SDC te chuan chuan tanpuina an hlan.

Bru chhungkaw hnih rawn let te hi chhungkaw aiawhin Pu Lalnunfela leh Pu Hriata (chhungkaw pa ber ve ve) te in tanpuina hi an dawng a, Bawrhsap bulah hian harsatna leh mamawh hrang hrang an neih heng electric leh gas Supply/connection chungchang te an thlen a, Bawrhsap chuan Dan in a phal chin leh Ministry of Home Affairs (MHA), Mizoram Sawrkar, Tripura Sawrkar leh Mizoram Bru Displaced People’s Forum (MBDPF) ten inremna thutlung an ziahna hnuaia phal a nih chin ah chuan puih a inhuam reng thu a hrilh a ni. 

Bru chhungkaw hnih te hi inremna thutlung zulzuiin kum 2 chhung a tana fixed deposit turin cheng nuai 4 ve ve cheque hlan an ni a, Monthly Asisstance kum hnih chhung a tan thlatin cheng 5000/- pek an ni anga, hmei bakah hian Housing Assistance a tana cheng 1,50,000/- phalsak an nih angin inremna thutlung zulzui tho in cheng 25,000/- ve ve pek an ni tawh bawk a, kum 2 chhung a tan ration buhfai puitling pakhat in ni khat ah gram 600 leh naupang pakhat in ni khatah gram 300 an dawng dawn bawk a ni.

Bru chhungkaw hnih Meidum khua a rawn let te hi Pu Mahesh Singla, IPS(Rtd) Adviser, Bru Repatriation, MHA chuan Inrinni khan an chenna hmun a lo tlawh tawh a ni.