No.1384/2020-2021

Vawiin khan Agriculture Department hotute leh Leilet neitu ten Kolasib District chhunga COVID 19 avanga leilet neitute harsatna chungchang sawihona I&PR Conference Hall Kolasib ah an neih a ni a. He sawihona hun kaihruaitu Kolasib District Agriculture Officer (DAO) Pu J. Rothanga chuan COVID 19 hri leng mek chu Agriculture lamin an tuar hle niin a sawi a, Buh leh bal thar chhuah chu hunbi nei thil anih avangin hun lo kal zel turah harsatna kan tawh lohna tur leh he harsatna lo thleng thei su kiang tura in kokhawm chuk chuk an nih thu sawiin, kumin ah chuan leilet khawi lai hmun mah awl lo tura hmalakna kalpui tum anih thu a sawi a ni.

He hunah hian Agriculture Crop Husbandry Director Pu Rohmingthanga Kawlni chuan, tun dinhmunah Mizoram in mipuite mamawh buh hmun thum a thena hmun khat chuah kan la thar chhuah thu a sawi a. Mizoram in kan mamawh buh tam zawk State dang atangin kan chawlut a, COVID 19 avang hian harsatna tawk thei kan ni, a ti a, Buh thar chhuah kawngah Kolasib leh Mamit District chu Mizoram buh zem lian tak District kan nih avangin Buh thar kawngah Sawrkarin nasa taka hmalakna kalpui a tum a ni, a ti bawk. Kolasib leh Mamit District a leilet zawng zawngah te buh chin khat vek anih theihna turin heng leilet te hi sawrkar chuan leilehna khawl hmanga an leilet te lehsak vek a tum thu a sawi a, Kolasib District mamawh Tractor leh leilehna hmanrua 32 mamawh a nih angin engemaw zah an pek tur thu a sawi bawk a ni.

Agriculture Research & Education Director Dr.H.Saithantluanga pawn thusawiin, COVID 19 avang hian Agriculture lama kan kal zel dan tur ngaihtuah a ngai a ni, a ti a, kan leilet enkawltu atan hnamdang vai kan chhawr an awm loh lai tak hian kan leilet te kan enkawl a ngai a, Sawrkar in theih tawp a chhuah hnuah leilet neitute lam pawhin theihtawp an chhuah ve a tul thu a sawi a ni.

He hunah hian Koalsib District chhunga leilet Zau 15 atangin leilet neitu thlan bik mi 50 chuang an kal khawm a, COVID 19 avanga an harsatna tawh chi hrang hrang te bakah hlawk zawka buh tharchhuah anih theih dan tur te sawi hona neih a ni bawk.