No.1383/2020-2021

Lunglei Bawrhsap chuan a hnuaia tarlan ang hian Community Quarantine Centre inkaihhruaina thupek a ti chhuak:

Mizoram Sorkar Lehkha No.B.13021/109/2020-DMR Dt.13.5.2020 in a sawi anga Community Quarantine Centre din chungchangah May 21,2020-ah Community Quarantine Centre atana an hmunhma din phalna petu Kohhran leh VLTF te nen meeting neih a ni a. A hnuai ami ang hian hmun hrang hranga Community Quarantine Centre te tan inkaihhruaina siam a ni.

A. Community Quarantine Centre (CQC)-a awm theih dan leh luh dan

1. Community Quarantine Centre-ah hian Rapid Antibody Test (RAT) result-a negative/non-reactive te chauh an awm thei ang. Heng Centre-a awm turte hian test an paltlang hnuah Intiamkamna/Undertaking an ziak ang.

2. Mahni chenna venga Community Quarantine Centre-ah chauh awm theih a ni. CQC siamna hmun neitu kohhran leh CQC awmna veng VLTF ten rem an tih chuan mahni chenna veng nilo CQC-ah pawh awm phalsak theih a ni ang.

3. CQC-a awm dawn hian Quarantine facility/Centre-ah medical test neih zel tur a ni a, chuvangin rawn haw te hruaitu tur chuan an hruai haw tur ten an rawn panna hmun Quarantine Centre chu an ngaihven reng tur a ni.

4. CQC-a awm phalsak/qualify te hruaitur hian a hruaitu turin two wheeler ni lovin lirthei ke pali nei a keng tur a ni a, hruai haw turin mi pakhat chauh kal tur a ni. State pawn atanga rawn haw hian ama bungrua chu amah in motor hnungah a dah ang a, lakchhuah leh hunah pawh amah vekin a hlang thla le hang. Eng motor-ah pawh Driver seat bul (front seat)-ah quarantine tur hi a chuang tur a ni lo.

5. Hmun dang khawiah mah ding leh peng kual lovin Community Quarantine Centre pan tlang nghal tur a ni.

B. Community Quarantine Centre (CQC)-a awm dan

1. CQC-a awm turte hian mahni mamawh hrang hrang bedding, lukham, rizai (Mutnaa sin tur), puan phah, thleng, no, fian etc an intum ang.

2. CQC-a awm chhunga inkaihhruaina hrang hrang sawrkar, kohhran/VLTF in a siamte zawm vek tur a ni.

C. Community Quarantine Centre (CQC) buatsaihna, hnathawktu, ei tur siam, security, medical leh bawlhhlawh chungchang

1. CQC buatsaih hna hi kohhran leh VLTF ten an kalpui anga. A tul angin District Administration-in a enpuiin ruahmanna a siampui ang.

2. Centre-a a tul ang hna chi hrang hrang electric, tui, etc leh centre-a awmte vil hna chu kohhran leh VLTF kutah a awm ang.

3. Chaw leh eitur siam leh buatsaihte kohhran leh VLTF kutah a awm ang. Buatsaih theih a nih loh chuan district Administration nen sawihovin ruahmanna siam a ni ang.

4. Security duty chu kohhran leh VLTF kutah a awm ang. Kohhran leh VLTF in security an dahte puibawmtu tur police ruahman a ni bawk ang.

5. CQC-a a tul angte enpui tur leh kohhran leh VLTF te puibawm turin Deputy Commissioner-in veng chhunga awm sawrkar hnathawkte atangin mi a ruat ang. Heng zingah hian CQC contact person ruat tel a ni anga, contact person hian CQC chhunga thil tul hrang hrangte a vilin a en anga, a tul angte District Administration-ah a thlen ang.

6. CQC viltu medical team siam a ni anga, CQC-ah hian awmchilh lovin medical team hian an vil anga, a tul huna koh theih reng bawk an ni ang.

7. Quarantine-a awmten anmahni bawlhhlawh an insenghawiin bawlhhlawh paihnaah an paih anga. CQC-a bawlhhlawhte sawngbawl (disinfect) dan chungchangah Disinfection Team-in ruahmanna an siam anga. Bawlhhlawh sawngbawl tawhte hi CQC-a collection point atangin UD&PA-in paih turin an la ang.