No.1465/2021-2022
Kolasib dated 19th July 2021: Vawiin chawhma khan DC Conference Hall, Kolasibah hrileng avanga inkaihhruaina kalpui chhunzawm dan tur chungchang sawi hona hun neih a ni a. He hun hi Dr.H.Lalthlangliana, Deputy Commissioner, Kolasib district-in kaihruaiin Dr.Lalhlimpuia, Chief Medical Officer, Sub Headquarters YMA, Kolasib district leh Kolasib Town Joint VLTF-te an tel a ni.

Dr.H.Lalthlangliana chuan Kolasib district chu state thenawmte nena inkalpawhna hmunpui a nih angin hri kai thar hmuhchhuah hmun thuma then a hmun khat hi chu heng luhka hrang hranga endikna hmun (Screening Point) atanga hmuchhuah anga ngaih theih a nih thu a sawi a. Kar liam ta chhunga hri kai dan en hian nitin za zelah mi 8 hri kai thar awm anga hrut rual theih a nih thu sawiin hri kai thar an awm dan en hian Kolasib chuan ziaawm lam a pan mek anga ngaih theih a nih thu a sawi. Deputy Commissioner chuan hri inkai darh theihna lak a fimkhurna chu mahni inchhungkhur theuh a chhungkua kan inenkawl dan atanga bul tan tur a nih thu sawiin hri kai te pawh hlauthawng leh chiai lova, mithiamten inenkawl dan tur an tih ang hrang hrangte zawm nachang an hriat a pawimawh thu a sawi.

Dr.Lalhlimpuia, CMO pawhin thu sawiin Kolasib district chhungah kum 18 chunglam vaccine pek chu ngawrh tak a kalpui mek zel a nih thu a sawi a, za zela 70 te hnenah vaccine hi pe tling tep tawh anga chhut a nih thu a sawi. Sethawn CCC a hri kai enkawlna hmun a ei leh in chungchanga sawisel awm chu a hmunah kalin enfiah a nih thu a sawi bawk a ni.

Vawiin thutkhawmnaah hian inkhaihhruaina khauh leh zual a kalpui a nih theih nan Executive Duty dah belh chungchangte, hrui pawh chhunzawm dan turte, VLTF Ex-gratia chungchangte sawi zau niin hri dona kawngah Sub Headquarters YMA-te nen thawh ho chhunzawm dan turte sawi a ni a, Vaccine lak chungchang leh fimkhur tur a mipui inzirtir kawng a hma lak dan turte sawi a ni bawk. Community Covid Care Centre, Home Isolation leh dawr bungrua hlan chhawn hun bituk dan sawi tel ni bawkin VLTF-te nen inrawn chunga kalpui chhunzawm zel dan tur te sawi a ni.