358/2023-2024

Kolasib dated 8th May 2023: Vawiin khan DRDO Conference Hall, Project Veng, Kolasibah Manipur atanga raltlan te dawnsawn dan tur leh chhawmdawlna pek chhunzawm dan tur relin thutkhawmna neih a ni a. Pu John LT Sanga, Deputy Commissioner chuan thutkhawmna hi kaihruaiin Superintendent of Police, Addl. DC, Project Director, BDO Thingdawl leh Bilkhawthlir, DIPRO, Public Health Engineering Department, Power & Electric Department, District Civil Supply Office, Joint Village Council, Sub Headquarters YMA, MUP leh MHIP hruaitute an tel a ni.

Thutkhawmnaah hian Kolasib district chhung a Manipur atanga raltlante dinhmun ngaihthlak niin Saipum, Saiphai, Pangbalkawn, Phainuam, Vairengte leh Rengtekawnahte hian raltlan hi an thahnem zual a. Raltlan mi 750 chuang chhinchhiah tawh niin an lo la luh belh mek zel bawk a ni. Chhungte leh hmelhriat belh tur nei an awm laiin Community Hall-a riah tir chhawngkaw thahnem tak an awm thu tarlan a ni a, khaw thenkhatah chuan Relief Camp sak tum an awm mek thu sawi a ni bawk. Raltlan te eitur leh mamawh hrang hrang ruahman sak chu a rang lam a ngaihtuah a tul thu thutkhawmnaah hian sawi niin hemi kawng a hma la tur hian President, Village Council kaihhruaina hnuai ah ‘Village Level Refugee Relief Committee’ din lailawk ni se tih rel a ni a, Branch YMA President chu Vice Chairman a ni ang.

Kolasib district khaw hrang hranga Manipur atanga raltlan te mamawh zualpui phuhruk nan Sub Headquarters, Kolasib kaltlangin khaw tin ah vehbur khawn tum a nih thu tarlan a ni a, hetih rual hian Pawl leh mimal inphal, raltlan te tan a tanpuina pe duh tan DC Office kaltlang a pek dan tur ruahman ni se tih a ni bawk. Manipur-a chi leh chi inkar a buaina chhuak avanga zohnahthlakte harsatna chu an tawrhpui thu leh Kolasib district chhung ah thlamuang tak leh hahdam tak a an awm theih nan ruahmanna siam thuai a tul thu thutkhawmnaah hian sawi niin hetih rual hian raltlan thlenkhawmna hmun ahte chuan inkaihhruaina mumal tak a kalpui a pawimawh thu sawi a ni bawk.

Manipur buaina avanga Mizoram mi leh sa, Guwahati atanga Aizawl lam pan mi 34-te chu tukin khan DC Circuit House, Kolasibah Minister Pu K.Lalrinliana leh Pu John LT Sanga, Deputy Commissioner-te chuan tukthuan an lo buatsaih sak a ni.