2409/2023-2024

2023 Khuangchawi thla ni 20: Mizoram Legislative Assembly Inthlanpui, 2023 lo awm tura Kolasib District huam chhunga assembly constituency pathum, 4-Tuirial (ST), 5-Kolasib (ST) leh 6-Serlui (ST) biala chuh tum mi panga chuan vawiin khan Returning Officer (RO)-te hnenah inthlan chuh turin nomination an theh lut leh a. Heti hian Kolasib District chhunga assembly bial pathuma inthlan chuh tura hming pe lut zawng zawng chu mi sawmpathum (13) an ni.

MLA Inthlanpuia chuh tumte tana hming pek luh theih ni hnuhnung ber, vawiin khan Tuirial biala chuh tum, Indian National Congress (INC) official candidate Pu Henry Zodinliana Pachuau leh Bharatiya Janata Party (BJP) official candidate Pu F. Vanhmingthanga te chuan Tuirial AC Returning Officer Pi Melody Ngurthantluangi hnenah nomination paper an theh lut a. Heti hian Tuirial biala chuh tura hming pe lut zawng zawng chu pali an ni.

Kolasib biala chuh tum, BJP official candidate Pu R. Lalthangliana chuan vawiin vek khan Kolasib AC Returning Officer Pu John LT Sanga hnenah nomination paper a theh lut ve bawk a. Heti hian Kolasib biala chuh tura hming pe lut zawng zawng chu pali an ni.

Serlui biala chuh tum, BJP official candidate Pu Robimson Malsawmtluanga Hmar leh Independent-a chuh tum Pu VL Nghaka te chuan vawiin vek khan Serlui AC Returning Officer Pu Lalmuan Puia hnenah nomination paper an theh lut ve leh bawk a. Heti hian Serlui biala chuh tura hming pe lut zawng zawng chu panga an ni.

Inthlan chuh tura hming pek luhte hi October ni 21, 2023 (Inrinni) chawhma dar 11:00-ah bial tina RO-te dawhkanah ṭheuh endik a ni ang.

Kolasib District chhunga assembly constituency pathuma inthlan chuh tura hming pe lutte chu he'ngte hi an ni:

4-Tuirial (ST) Assembly Constituency: