2408/2023-2024

Champhai the 20^th October, 2023 – Vawiin chawhnu khan Champhai DC&DEO leh 24 Champhai South Returning Officer ni bawk Pu James Lalrinchhana kaihhruaiin DC Conference Hall, Keifangtlangah Press Meet neih a ni.

Vawiin Press Meet ah hian 23 Champhai North Returning Officer Pu M. Misael, 25 East Tuipui Returning Officer Pu Lalrinawma leh election kaihhnawih officials te telin Champhai District MJA Vice President Pu Lalhlupuia leh member dangte an tel a ni.

Press Meet-ah hian Champhai District huamchhunga Election hmachhawn tura inpuahchahna kal zelte leh hmachhawp hrang hrangte sawiho a ni.

Nimin khan Candidate 7 ten Nomination an thehluh hnuah vawiin khan mi pathum in nomination thehlut lehin Champhai District-ah a zavaiin Nomination thehlut mi 10 an awm a ni. Nomination thehluh te enfiahna Scrutiny hi naktuk dar 11 atangin Returning Officer ten an nei dawn a ni.

Election Commission of India tirha Champhai District chhung Constituency pathum vil tura ruat Expenditure Observer Pu Abhishek J Jain chuan October ni 14 khan Champhai lo thlengin election insenso vil kawnga Champhai District hmalaknate a rawn enfiah a. Champhai District-a inthlan insenso chungchanga hriat fiah duh leh report duh nei tan Expenditure Observer Pu Abhishek J Jain hi 9233968789 ah engtiklai pawhin mipuiten an biak theih a ni.

Champhai District-a inthlan vil turin Election Commission of India chuan General Observer pahnih leh Police Observer pakhat a ruat a. 23 Champhai North AC, leh 24 Champhai South AC te vil turin General Observer atan Dr Ranjit Kumar Singh, IAS chu ruat niin, 25 East Tuipui AC General Oberver atan Shri Sanjay Kumar, IAS chu ruat a ni a. Shri Sukesh Kumar Jain, IPS chu election vuakveta Champhai District puma venhimna leh dan leh thupek kenkawhte enfiah turin Police Oberver ah ruat a ni. Heng Observer-te hi zaninah Champhai lo thleng kim tura beisei niin, naktukah Returning Officer tena Nomination Scrutiny an neih an enfiah pui dawn a ni.

Nomination hi October ni 13 atang khan hawn a ni a, Sawrkar hnathawh ni, chawhma dar 11 leh tlai dar 3 inkarah thehluh theih niin, naktuk October ni 20, 2023 (Zirtawpni) tlai dar 3 thleng thehluh theih a ni a. October ni 21, 2023 (Inrinni) ah Nomination paper tling khawm te hi enfiah an ni anga, October ni 23 (Thawhtanni) tlai dar 3 thleng inhnuhdawhna hun hawn a ni bawk ang.

Mizoram Assembly Election, 2023 poll date hi November ni 7, 2023 niin, zing dar 7:00 atanga tlai dar 4:00 inkarah inthlan hi neih a ni ang.

Champhai District Final Electoral Roll, 2023 chu October ni 4, 2023 khan tlangzarh a ni a. Roll in a tarlan danin Champhai District ah Voter mi 57,180 an awm a, an zinga mi 27,880 te hi mipa niin, hmeichhe voter 29,300 an awm a. District pumah Polling Station 84 a awm a ni.